İspaniya hökuməti Türkiyənin zəlzələ bölgəsində səyyar xəstəxana quracaq

İspaniya hökuməti Türkiyənin Kahramanmaraş şəhərində zəlzələ qurbanlarına kömək etmək üçün bölgədə bir səyyar xəstəxana quracaq.
Sonxeber.az xəbər verir ki, İspaniya Xarici İşlər Nazirliyindən verilən açıqlamada səyyar xəstəxananın qurulması üçün Türkiyəyə 70 nəfərlik peşəkar heyət göndəriləcəyi bildirilib.

Xarici işlər naziri Jose Manuel Albares Twitter hesabında bildirib ki, səyyar xəstəxanadan əlavə, Milli Səhiyyə Sisteminin qrupları Türkiyədə fəlakət bölgələrinə göndəriləcək və Suriyaya yardım ediləcək.

Nazirlikdən verilən açıqlamada İspaniyanın yardım qrupu 72 saat ərzində dünyanın istənilən yerinə yerləşdirilməyə hazır olduğu, komandada 40-dan çox tibb işçisi, 10-dan çox logistik yardım mütəxəssisi olduğu bildirilib.
İspaniya Müdafiə Nazirliyi, zəlzələdə xilasetmə işlərinə dəstək vermək üçün ümumilikdə 500 dəniz zabitinin olduğu Juan Carlos I və Galicia gəmilərinin dünəndən etibarən Türkiyəyə yola düşdüyünü açıqlayıb.

Türkiyənin Madriddəki səfirliyi də Türk Hava Yollarının dəstəyi ilə zəlzələ bölgələrinə çatdırılmaq üçün paltar, ədyal, çadır və yuxu çantaları kimi yardımların toplanmasına başlanıldığını açıqlayıb.

Şəbnəm Lətifi

Telegramda izləyin