"Azərbaycanda minimum əməkhaqqı 600 manat olmalıdır" - AÇIQLAMA

Minimum əməkhaqqı ixtisassız əməyə və xidmətə görə verilən ən aşağı ödəniş olmaqla, qanunla bu sahədə müəyyən edilən sosial normativdir. Məlum olduğu kimi onun mahiyyəti həmin əməkhaqqıya çalışan şəxsin öz minimum tələbatını ödəyə bilməsindən ibarətdir. Hazırda minimum əmək haqqı 345 manat təşkil edir. Əmək və Əhalinin Sosial Müdafiəsi Nazirliyinin minimum əməkhaqqının artırılması ilə bağlı təkliflərini hazırlayaraq noyabrın 1-dək təqdim edəcəyi gözlənilir. Bəs, minimum əməkhaqqı nə qədər olmalıdır. Bu məbləğ necə hesablanmalıdır?

Məsələ ilə bağlı iqtisadçı Rəşad Həsənov Sonxeber.az-a açıqlama verib.

İqtisadçı bildirib ki, ölkədə minimum əməkhaqqı 600 manat olmalıdır:

"Minimum əməkhaqqının məbləğinin müəyyən edilməsində müxtəlif parametrlərin nəzərə alınmasına ehtiyac var. Burada sadəcə bir şəxsin dolanışıq xərcləri əsas deyil. Azərbaycanda statistik göstəricilər əsasında deyə bilərik ki, bir işçiyə 2 və ya daha artıq vətəndaşın qayğısına qalmaq düşür. Ölkə əhalisi 10 milyon 200 min təşkil edir. Bunların 4 milyon 900 mini əmək fəaliyyəti ilə məşğul olan insandır. Bu o demekdir ki, orta hesabla 1 nəfər 2 şəxs və daha artıq insanın aylıq xərclərini qazandığı məbləğlə ödəməlidir.

Eyni zamanda 2024-cü il üçün ehtiyac meyarının 270 manat olduğunu nəzərə alsaq, təxminən ölkədə "minimum əməkhaqqı 600 manat olmalıdır" deyə bilərik. Təbiii ki,burada 270 manatın özü də bir nəfərin aylıq xərci olaraq mübahisəli məsələdir. 2012 ci ildə hökümət minimum əməkhaqının orta aylıq əməkhaqqının 60 faizinə çatdırılmasını hədəf müəyyən etmişdi. Hazırda orta aylıq əməkhaqqı ölkə üzrə 1000 manata yaxındır -988 manatdır. Bu aspektəndə məsələyə yanaşsaq, bu gün minimum əməkhaqqının 600 manata qədər çatdırılması zərurəti var. Ölkədə minimum əməkhaqqının həddi 600 manat civarında olsa, nisəbətən daha ədalətli və layiqli əmək mühitinin formalaşması müsbət təsir göstərə bilər".

Gülcahan Məmmədova

Telegramda izləyin