Əyləncə yoxsa ÖLÜM: Dənizə getmək uzaqlara üzmək demək deyil!

Xəbər verdiymiz kimi, Xəzər rayonu, Zirə qəsəbəsi yaxınlığında nəzarətsiz ərazidə dənizdə 3 nəfərin batması barədə ilkin məlumat daxil olub. Məlumatla əlaqədar dərhal FHN-nin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri axtarışlara cəlb olunub. Hazırda batdığı ehtimal olunan şəxslərin, 2007-ci il təvəllüdlü Ağayev Ağaşirin Ramin oğlu, 2008-ci il təvəllüdlü Aslanov Abid Asif oğlu və 2009-cu il təvəllüdlü Aslanov Anar Asif oğlunun axtarışları FHN-in qüvvələri tərəfindən davam etdirilir.

Göründüyü kimi, boğulmalar hər yerdə, hər an ola bilər. Suda boğulma və batma halları ən çox azyaşlılar və yeniyetmələrdə rast gəlinsə də, böyüklərdə boğulma halları müşahidə olunur. Boğulma gözdən qaçan qlobal ictimai sağlamlıq problemidir. Boğulma zamanı suya batmadan əvvəl suyun üstündə mübarizə aparmaq orta hesabla 20-60 saniyə çəkir. Ölümün baş verməsi 3-4 dəqiqəyə bərabərdir. Boğulma dünyada ən sürətli ölüm növlərindən biridir. Edilən xəbərdarlıqlara baxmayaraq, hələ də vətəndaşlar bu mövzuya etinasız yanaşır. Bəs boğulma hallarına qarşı necə mübarizə aparaq?

Mövzu ilə bağlı Sonxeber.az-a danışan onkoloq-həkim, tibb elmləri doktoru, professor və səhiyyə eksperti Adil Qeybulla bildirib ki, dənizdə boğulmaların böyük bir səbəbi insanların məsuliyyətsizliyidir:

"Sərxoş vəziyyətdə dənizə girmək, uzaqlara getmək, həmin yerdə şəxsin qıcolma və başqa əlamətləri olduqda, heç bir kömək edən tapılmır və boğulur. Bundan başqa zəlzələ vaxtı Xəzər dənizinin sahillərində müəyyən yarğanlar var. Bəzən insanın ayağı ora düşür və üzə bilməyən adamlar orada boğula bilirlər. Bütün bunlara görə, çox ehtiyatlı olmaq lazımdı. Dənizə gedən insanlar yaxşi olar ki, tək olmasınlar. Onlar bir-birini müşahidə etməlidir. Çimərlikdən ayrılmış yerdən uzağa getmək qəti qadağandır. Kiminsə hansısa bir xəstəliyi varsa mütləq şəkildə bu adamlar ilə bağlı həkim rəyi olmalıdır. Eyni zamanda onunla gedən şəxsin yanında adam olmalıdır".

Ekspertin sözlərinə görə, dənizə getmək uzaqlara üzmək demək deyil. Dənizə getmək dəniz vannası qəbul etmək deməkdir. Bunu insanlar unutmamalıdır:

"Əfsuslar olsun ki, bəzən biz cavan uşaqları dənizdə boğulmalara görə itiririk. Bu da ölkəmiz üçün ağır itkidir. İnsanlar məsuliyyətli olmalıdır və ciddi yanaşmalıdır. Bəzən elə situasiyalar yaranır ki, dalğıclar özləri boğulmuş adamı tapmaqda çətinlik yaşayırlar. Dalğaların intensiv vaxtı olur. Məsləhət görülməyən havalarda dənizə gedilməməlidir. Bəzən olur ki, şəxs özü günvurma halında olur və bunu özü hiss etmir. Dənizə elə halda girən adamın vəziyyəti daha da pis olur. Bu zaman huşunu itirmə baş verə və şəxs boğula bilər. Çoxsaylı səbəblərə görə insanlar diqqətli olmalıdır. Dənizdə çimməyi sıradan bir hadisə kimi yox, müəyyən tələbləri gözləyərək oraya daxil olmalıdırlar".

Sevda Səfərova

Telegramda izləyin