Mərhum bəstəkarın qızı: "Qarabağ" mahnısı ilə bağlı görülən tədbirlər bəhrəsini verəcək"

"Tarixi qələbədən sonra "Qarabağ" mahnısının Azərbaycan üçün, hər birimiz üçün necə böyük məna daşıdığını ermənilər görür və anlayır".

Bunu "Report"a açıqlamasında mərhum bəstəkar Bəhram Nəsibovun qızı, jurnalist Güldəstə Nəsib erməni ifaçının "Qarabağ" mahnısını mənimsəyərək ifa etməsinə münasibət bildirərkən deyib.

O bildirib ki, "Qarabağ" mahnısını Bəhram Nəsibov İncəsənət Universitetində oxuduğu illərdə yazıb, sözləri də, musiqisi də özünündür:

"Tarixi dəqiq deyə bilmərəm, amma ötən əsrin 60-cı illəri olub. Atam tələbə yataqxanasında qalırdı. Mahnı hazır olub, atam tarda ifa edərək özü də oxuyub. Onun səsinə bütün yataqxana yığışıb. Həmin zaman yataqxananın erməni komendantı da gəlib, qulaq asıb və deyib ki, bu mahnıya bir-iki Qarabağ ermənisinin də adını daxil elə. Atam etiraz edib. Deyib ki, erməninin Qarabağa nə dəxli var ki, mahnıya da əlavə edim? Komendant qəzəblənib və atamı yataqxanadan çıxarıb. Bundan sonra isə atam kirayə qalmağa məcbur olub".

Güldəstə Nəsib bildirib ki, mahnını 1972-ci ildə Müəllif Hüquqları Agentliyi (indiki Əqli Mülkiyyət Agentliyi) qeydiyyatdan keçirib:

"Öz əli ilə yazdığı ərizə indi də agentlikdə qorunub saxlanır. Mahnının ilk ifaçısı Xalq artisti Arif Babayev olub. Sonralar isə müğənnilərin əksəriyyəti bu mahnıya öz repertuarında yer ayırıb. 44 günlük Vətən müharibəsindən sonra bu mahnı xüsusi məna kəsb edib. O günlərdə əsgərlərimiz, sadə vətəndaşlarımız - hamı "Anadır arzulara hər zaman Qarabağ" oxuyurdu. Bu gün bu mahnı azad Qarabağın himni kimi səslənir. Şuşada, Bakıda, eləcə də ölkəmizdən kənarda rəsmi tədbirlər məhz bu mahnı ilə açılıb bağlanır. Bunun nə qədər qürurverici olduğunu sözlə çatdırmaq çətindir.

Tarixi qələbəmizdən sonra "Qarabağ" mahnısının Azərbaycan üçün, hər birimiz üçün necə böyük məna daşıdığını ermənilər də görür və anlayır. Elə ona görə də bir vaxtlar erməni komendantın başlatdığı çirkin işi davam etdirirlər, müəllifin ruhunu incidir, məğlubiyyətin gətirdiyi acizlik, natamamlıq sindromlarını ört-basdır etməyə çalışırlar".

Mərhum bəstəkarın qızı "Qarabağ" mahnısının ermənilər tərəfindən mənimsənilməsinə olan cəhdə cəmiyyətin və dövlət qurumlarının nə qədər həssas yanaşmasına görə minnətdarlığını bildirib:

"Bu mahnı hələ 1972-ci ildə Əqli Mülkiyyət Agentliyində qeydiyyatdan keçirildiyinə görə mahnı artıq Bəhram Nəsibovun yox, bütün Azərbaycan xalqının mülkiyyətidir. Dövlət qurumları bu məsələ ilə bağlı çox ciddi iş aparırlar. Əqli mülkiyyət sahəsində mövcud olan beynəlxalq normalar çərçivəsində Əqli Mülkiyyət Agentliyi və Mədəniyyət Nazirliyi bütün mümkün tədbirləri həyata keçirirlər. Hər iki qurum Azərbaycan bəstəkarı Bəhram Nəsibovun "Qarabağ" adlı əsərinin musiqisinin qanunsuz mənimsənilməsi və müəlliflik hüququnun digər şəkildə pozulması ilə bağlı birgə bəyanat da verib. İnanıram ki, görülən tədbirlər tez bir zamanda bəhrəsini verəcək".

Xatırladaq ki, Azərbaycan bəstəkarı Bəhram Nəsibovun "Qarabağ" ("Anadır arzulara hər zaman Qarabağ") adlı musiqi əsəri erməni ifaçı Gor Yepremyan tərəfindən "Sirun jan" adı altında mənimsənilərək ifa edilib. Mədəniyyət Nazirliyi və Əqli Mülkiyyət Agentliyi Azərbaycan bəstəkarı Bəhram Nəsibovun "Qarabağ" adlı əsərinin musiqisinin qanunsuz mənimsənilməsi və müəlliflik hüququnun digər şəkildə pozulması ilə bağlı birgə bəyanat verib.

Telegramda izləyin