Bu halda kirayə mənzillər ucuzlaşacaq, UNİVERSİTETLƏR İSƏ... - AÇIQLAMA

Bildiyimiz kimi, avqust-sentyabr aylarında kiirayə mənzil bazarında ciddi bahalaşma müşahidə olunur. Bunun başlıca səbəbi isə bölgələrdən ali təhsil almaq üçün paytaxta üz tutan tələbələrdir. Həmin tələbələrin əksəriyyəti Bakı ətrafı və digər şəhərlərdə məskunlaşır. Qiymətlərin baha olması isə tələbələrin şəhərin mərkəzində məskunlaşmasına imkan vermir. Bakı ətrafı ərazilərdə yerləşən tələbələr əlavə yol xərclərinə görə ciddi sosial problemlərlə üzləşirlər.

Türkiyədə regionlardan təhsil almaq üçün gələn tələbələrə yurdlar və yataqxanalar tikilir. Vaxtilə sovet dövründə Bakıda tələbələr üçün yataqxanalar inşa edilirdi. Lakin məlum səbəblərdən həmin yataqxanaların əksəriyyəti keçmiş məcburi köçkünlərə verildi. Artıq yataqxanaların istismar müddəti bitdiyi üçün sökülür. Tələbələr üçün yurdlar və yataqxanların tikilməsi kirayə mənzil bazarında enmələrə səbəb ola bilər?

Mövzunu Sonxeber.az-a danışan əmlak məsələləri üzrə ekspert Elnur Fərzəliyev deyib ki, son illər paytaxt Bakı şəhərində və ölkənin digər böyük şəhərlərində daşınmaz əmlakların satış qiymətinin artması ilə bərabər, kirayə mənzil bazarında ciddi qiymət artımı müşahidə olunur:

"Paytaxt Bakı şəhərində kirayə mənzil bazarının böyük hissəsini tələbələr təşkil edir. Mənzillərin kirayə qiymətinin artması tələbələr üçün bir çox problemlər yaradır. Onlar mərkəzə və ali təhsil müəssisələrinə yaxın ərazilərdə mənzil tapmaqdıqlaruna görə məcburən Bakı ətrafı ərazilərə üz tuturlar. Bu isə onların gündəlik olaraq bir neçə saatını yollara sərf etməsinə səbəb olur. Əlavə yol xərcləri isə pul itkisi ilə nəticələnir. Ölkəmizdə 90-ci illərin əvvələrinə qədər demək olar ki, bütün ali təhsil müəssisələrinin, hətta peşə məktəblərinin belə yataqxanaları var idi. Birinci Qarabağ müharibəsindən sonra bizim məcburi köçkünlərimizim bir hissəsi məhz həmin yataqxanalarda yerləşdirildi. Uzun illərdir dövlət tərəfindən məcburi köçkünlər evlə təmin olunur. Bundan əlavə azad olunmuş ərazilərimizdə tikinti və bərpa işləri getdikcə həmin məcburi köçkünlərimiz mərhələli şəkildə öz yurd-yuvalarına göndərilir"

Ekspertin sözlərinə görə, tələbə yataqxanaları yaşayış üçün yararsızdır. Bəzi ərazilərdə həmin yataqxanalar sökülüb. Yalnız yataqxanaların hər birinin böyük torpaq sahəsi var. Bütün bu yataqxanaların hər biri ali təhsil müəssisələrinə ən yaxın məsafədədir:

"Biz həm dünya təcrübəsinə, həm də yerli vəziyyəti nəzər yetirsək, bu gün həmin tələbə yataqxanalarının yerində daha hündürmərtəbəli yataqxanalar inşa etməklə, tələbələrin ev problemini aradan qaldırmış olarıq. Bununla da kirayə mənzil bazarında ciddi boşluqlar yarana bilər və qiymətlərin enməsinə gətirib çıxara bilər. Biz tikinti xərclərinə nəzər salsaq hər il yataqxana binasının tikilərək tələbələrə minimal qiymətə kirayə verilməsi, həmin yataqxananın qısa müddət ərzində, yəni 5-6 il ərzində oraya ödənilmiş bütün xərcin geri dönüşünə səbəb ola bilər. Bundan əlavə həmin yataqxanadan gələn gəlir, ali təhsil müəssisələrinin büdcəsinə illik olaraq böyük məbləğdə vəsait gətirmiş olar. Bu da həmin ali təhsil müəssisələrinin digər xərclərini qarşılaya bilər".

Sevda Səfərova

Telegramda izləyin