Un yenə UCUZLAŞDI: Çörəyin qiyməti 40 qəpik OLACAQ? - AÇIQLAMA

Xəbər verdiyimiz kimi Azərbaycanda unun topdansatış qiyməti son aylarla müqayisədə yenə aşağı düşüb. Avqustun 12-dən etibarən istehsalçılar unun qiymətini bir manatadək azaldıblar. Ötən ayla müqayisədə unun topdansatış qiymətində 0,7-1,3 manat azalma müşahidə olunur.

Bəs un məhsullarında ucuzlaşma davam edərsə çörəyin qiyməti 40 qəpik ola bilər? Mövzu ilə bağlı iqtisadçı ekspert Eyyub Kərimli Sonxeber.az-a açıqlama verib:
"Hazırda unun qiymətinin enməsi sabit davam etsə, ölkədə çörəyin və un məmulatlarının qiymətinin aşağı enməsinə səbəb olacaq. Belə ki, biz unu və taxılı digər ölkələrdən idxal edirik. Dünyada baş verən un məhsullarında baş verən ucuzlaşma, ölkəmizdə un məhsullarının qiymətinin aşağı enməsinə səbəb ola bilər. Unun qiymətində 1 manat 30 qəpik enmə müşahidə olunubsa, bu da çörəyin qiymətinin 5 qəpik aşağı düşməsinə səbəb ola bilər. Amma çörəyin qiymətinin daha çox aşağı düşməsi üçün, unun qiymətində 5 manata yaxın enmə baş versin".

Qeyd edək ki, açıqlanan rəsmi məlumatda ölkədə hazırda 50 kq-lıq unun topdansatış qiyməti 26,1 - 27,8 manat aralığında dəyişir. Ötən ay bu rəqəm 26,8-28,5 manat, iyun ayında isə 28,3-29,5 manat təşkil edirdi. Ən ucuz un növü "Dəvəçi-Taxıl" MMC, ən bahalısı isə "Azeri-Arapoğlu U.S.və T.LTD" BM tərəfindən bazara təqdim olunur.

Sevda Səfərova

Telegramda izləyin