Əsgər durduğu yerdə özünü niyə ÖLDÜRSÜN? - AÇIQLAMA

Müdafiə Nazirliyinin "N" saylı hərbi hissəsinin hərbi qulluqçusu, əsgər Vəli Asəf oğlu odlu Abbasov silahdan istifadə etməklə özünü öldürüb. Bu barədə Respublika Hərbi Prokurorluğundan məlumat verilib. Bildirilib ki, daxil olmuş məlumat əsasında Şəmkir hərbi prokurorluğunun və Azərbaycan Respublikası Hərbi Prokurorluğunun Kriminalistika və İnformasiya Texnologiyaları idarəsinin əməkdaşları tərəfindən hadisə yerinə və meyitə baxış keçirilib, iş üçün əhəmiyyət kəsb edən predmetlər maddi sübut kimi götürülüb, eləcə də izahatlar alınıb və digər hərəkətlər icra edilib.

Artıq müharibə olmadığı halda əsgərlər ya intihar edir, ya da silahdan ehtiyatsız davranmaqla özünü öldürür. Əsgərlərin silahdan ehtiyatsız davranma və intihar səbəbləri nə ilə bağlıdır? Mövzu ilə bağlı hərbi ekspert Emin Həsənli Sonxeber.az-a açıqlama verib:

"Məsələ Müdafiə Nazirliyinin aidiyyəti qurumları ilə Hərbi Prokurorluğun əməkdaşları tərəfindən birgə araşdırılır. Bu cür hadisələr ilə bağlı cinayət işi qaldırılır və hər tərəfli hüquqi qiymət verilir. Hesab edirəm ki, məsələ tam detallı araşdırılacaq. İnsan həyatında və hərbidə bu cür hallar baş verir. Hərbi xidmətdə bu halların baş verməsi qaçınılmazdır. İstənilən bir sahədə səhvlər olur. Dünyanın ən ideal ordularında belə bu kimi hallara rast gəlinir".

Hərbi ekspert Tərlan Eyvazovun sözlərinə görə, silahla davranış qaydaları ciddi məsələdir. İstənilən halda əlində silah olan adam təlimatlara diqqət yetirməlidir:

"Silahın götürülməsi, təhvil verilməsi və yerinə qoyulması, istifadə qaydalarına düzgün riayət edilərsə, belə bədbəxt hadisələrin qarşısı alınar. Orduda sayca Müdafiə Nazirliyinin şəxsi heyəti daha çoxdur. Ümumiyətlə orduya 18 yaşı tamam olan və silahla davranmağı bacarmayan çağırışçılar gəlir. Onlar ilə bağlı xüsusi təlimatlar var. 3 ay ərzində həmin çağırışçılar ilə təlimlər keçilir. Təzə gələn çağırışçılar qarovul xidmətinə, nə də silahla istifadə olunan təlimlərə cəlb edilmirlər. Onlara digər idman və silahdan istifadə qaydaları öyrədilir. Burada konkret olaraq silahdan istifadə qaydaları konkret olaraq pozulub. Əsgər özünü öldürürsə bu intihardır. Amma təsadüf nəticəsində silahdan düzgün istifadə edilmədikdə bu hallar baş verir. Komandirlərin, çağırışçıları çağırışa cəlb edən qurumların üzərinə ciddi məsuliyyət düşür".

Qeyd edək ki, hazırda istintaq davam etdirilir və qanunvericiliyin tələblərinə uyğun olaraq bütün tədbirlərin görülməsi təmin olunacaq.

Sevda Səfərova

Telegramda izləyin