"Bu qürur hissini xalqımıza yaşadan fədakar qəhrəmanların əziz ruhu qarşısında baş əyirik" - DEPUTAT

"Bu gün Anım günüdür – 27 sentyabr qəhrəmanlarımızın düşmən üzərində qələbəsinin dünya tarix salnaməsinə yazılmasının başlanğıc günüdür".

Bunu Sonxeber.az-a danışan deputat Pərvanə Vəliyeva bildirib.

Deputat qeyd edib ki, o qəhrəmanlar ki, Tovuz hadisələri zamanı şəhərə axışdılar, torpaqlarımızı almağa gedirik deyərək dövlət başçımıza, Ali Baş Komandana, Azərbaycan xalqına səsləndilər:

"O gecə hər birimiz - bütün Azərbaycan xalqı ayaqda idi. Bundan sonra geriyə dönüş yox idi, gənclərimiz könüllü cəbhəyə yollandılar. Onların bu şücaəti daim yaddaşlarda qalacaq, gələcək nəsillərə nümunə olacaq. Azərbaycanın şanlı tarixini yazan mərd oğulların canı-qanı bahasına torpaqlarımız 30 illik işğaldan azad edildi. Ölkəmizin ərazi bütövlüyünü, suverenliyini bərpa edən bütün şəhidlərimizə Allahdan rəhmət diləyirik. Cənab Prezident İlham Əliyevin dediyi kimi, İkinci Qarabağ müharibəsi ilə Azərbaycan xalqı bütün dünyaya öz gücünü, yenilməz, əyilməz ruhunu göstərdi. Bu şanlı qələbə hər bir Azərbaycan vətəndaşı üçün böyük qürurdur. Bizə isə bu qürur hissini xalqımıza yaşadan fədakar qəhrəmanların əziz ruhu qarşısında baş əymək düşər".

Telegramda izləyin