"27 sentyabr Azərbaycan tarixinə Böyük Zəfərin və 44 günlük müharibənin ilk günü kimi yazılıb" - Bəhruz Quliyev

"27 sentyabr Azərbaycan tarixinə Böyük Zəfərin, möhtəşəm Qələbənin, 44 günlük müharibənin ilk günü kimi yazılıb. Məhz bu gün Müzəffər Ali Baş Komandan İlham Əliyevin sərkərdəliyi altında Ordumuzun rəşadəti, xalq və dövlətin birliyi imtahan edildi, sınaqlardan daim alnı açıq çıxan vətənpərvər Azərbaycan gəncliyi bu dəfə də Vətən üçün sinəsini qabağa verdi. 44 gün davam edən İkinci Qarabağ müharibəsində fərarilik faktının olmaması xalqımızın doğma torpağı uğrunda hər an silaha sarılmağa hazır olduğundan xəbər verdi. Prezident İlham Əliyevin qismən səfərbərlik elan etməsi də könüllü olaraq döyüşə getmək istəyənlərin qarşısını ala bilmədi. Hər kəs cəbhədə əldə ediləcək qələbədə payının olmasını istəyirdi. Sosial vəziyyətindən, maddi imkanından asılı olmayaraq bütün vətəndaşlar orduya dəstək üçün müraciət edir, Azərbaycanda yaşayan digər xalqların nümayəndələri cəbhəyə getmək üçün səfərbərlik idarələrinə üz tuturdular. Bu, xalqımızın birliyi, dövlətinə olan inamı, ordusuna, Ali Baş Komandanına olan güvəni idi".

Bunu Sonxeber.az-a açıqlamasında SƏS Media Qrupun rəhbəri, siyasi analitik Bəhruz Quliyev deyib.

Bəhruz Quliyev xüsusi olaraq qeyd edib ki, 2020-ci ilin 27 sentyabrında başlayan və 44 gün davam edən Vətən müharibəsində işğal altında olan torpaqlarımız qəhrəman əsgər və zabitlərimizin, şəhidlərimizin, qazilərimizin qanı və canı bahasına işğaldan azad olundu:

"Ermənistanın ölkəmizə qarşı başlayan növbəti hərbi təcavüzünə cavab olaraq, Silahlı Qüvvələrin Ali Baş Komandanı İlham Əliyevin rəhbərliyi ilə işğal altındakı torpaqlarımızın azad edilməsi məqsədilə Vətən müharibəsinə başladı. Azərbaycan Prezidentinin sədrliyi ilə keçirilən Təhlükəsizlik Şurasının iclasında dövlətimizin başçısı qətiyyətlə bəyan etdi: "Bizim mübarizəmiz haqq mübarizəsidir və bu gün Azərbaycan vətəndaşları dövlətə tam dəstək göstərirlər, bu dəstəyi biz daim hiss edirik. Azərbaycan vətəndaşı Azərbaycan Ordusunun yanındadır. Otuz ilə yaxın öz doğma torpaqlarına qayıda bilməyən soydaşlarımıza da üz tutub deyirəm, biz əlimizdən gələni edəcəyik ki, sizi öz doğma torpaqlarınıza qaytaraq". Bəli, Azərbaycan xalqı işğalla heç zaman barışmadı. 2016-cı il aprel ayında Lələtəpə və 2020-ci il iyul ayında Tovuz döyüşləri də bunu bir daha sübut etdi".

Bəhruz Quliyev vurğulayıb ki, 44 günlük müharibədə Azərbaycan Ordusu düşmənə layiqli cavab verməklə bir daha Vətənə olan məhəbbətini nümayiş etdirdi, digər tərəfdən bəyan etdi ki, Azərbaycan 30 il ərzində beynəlxalq hüquqa söykənib, BMT TŞ-nın dörd qətnaməsinə riayət olunmasını tələb edib və dünyadan ədalət istəyib:

"Təəssüf ki, dünyanın nüfuzlu təşkilatları və dövlətləri Ermənistanı müdafiə edərək işğala məruz qalanla işğalçı arasında heç bir fərq qoymayıb. Ali Baş Komandan İlham Əliyev 17 il ərzində yetişdirdiyi ordusuna və xalqına, o cümlədən dost ölkələrə güvəndi, 44 günlük müharibə ilə Qarabağı işğaldan azad etdi. Bir xalq, dövlət olaraq qürur hissi keçiririk ki, uzun illərdən sonra ərazi bütövlüyümüzü və surenliyimizi bərpa etdik, Ölkəmizin ərazi bütövlüyü uğrunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti İlham Əliyevin 2020-ci il 2 dekabr tarixli Sərancamı ilə hər il sentyabrın 27-nin Azərbaycan Respublikasında Anım Günü kimi qeyd edilməsi qərara alındı. Qazanılan parlaq Qələbə şanlı ordumuzun gücünün və qüdrətinin göstəricisi, milli həmrəyliyimizin təcəssümü, "Dəmir yumruq" və ali ədalətin təntənəsidir. Əsrlər keçəcək xalqımız daima bu günləri böyük sevinc və qürur hissi ilə qeyd edəcək".

Telegramda izləyin

instagramda izləyin