Azərbaycan xalqı 44 günlük müharibə zamanı bir bayraq altında birləşdi

Prezident İlham Əliyevin 2 dekabr 2020-ci il tarixli Sərəncamına əsasən, Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq hər il sentyabrın 27-si Azərbaycanda Anım Günü kimi qeyd edilir. 44 gün davam edən hərbi əməliyyatlar nəticəsində Azərbaycan Ordusu Ermənistanın silahlı qüvvələrini darmadağın edərək tariximizə yeni bir gün yazdı və şəhidlərimizin qisası alındı. Əlbəttə ki, bu 44 günün hər günü Azərbaycanın şanlı tarixidir.

Mövzu ilə bağlı Sonxeber.az-a danışan hərbi ekspert Emin Həsənli deyib ki, 27 sentyabrın Azərbaycanın siyasi və hərbi tarixində müstəsna yeri var:

"27 sentyabr zəfərin başlanğıc günüdür. 44 günlük Vətən müharibəsində Azərbaycan dövləti, ordusu və xalqı böyük şücaət və qəhrəmanlıq göstərərək torpaqları işğaldan azad etdi. Allah şəhidlərimizə rəhmət etsin, qazilərimizə can sağlığı versin! Azərbaycan dövləti dünyaya nümunə oldu. Azərbaycan şəhidləri, gəncləri vətən, xalq və torpaq sevgisinin nə qədər üstün olduğunu dünyaya sübut etdi. Məhz Azərbaycan himnində "Səndən ötrü can verməyə cümlə hazırız!" fikirləri boş məna vermir. Gənclərimiz həmin sözlər aktında canlarını qurban verdilər. Şəhidlərimiz öz yaşamaq hüquqlarından keçdi. Minlərlə can Azərbaycan torpaqları uğrunda qurban oldu. Azərbaycan dövləti hərb tarixində klassik-müasir müharibə apardı. Elə oldu ki, Şuşada bir sıra ərazilər yüngül silahlar ilə işğaldan azad olundu. Hadrutda isə xüsusi əməliyyat keçirildi".

Ekspertin sözlərinə görə, dünya hərb tarixində yeganə hadisə idi ki, müharibə zamanı torpaqlarımızı itirmədik. Düşmən bir dəfə də olsun əks-hücuma keçə bilmədi:

"Bütün bunlar Azərbaycan Ordusunun dözümündən, cəsarətindən irəli gəlir. 24 saatlıq antiterror əməliyyatları və 44 günlük Vətən müharibəsi ərazi bütövlüyümüzü və suverenliyimizi təmin etdi. Dünya hərb akademiyalarında müharibələr araşdırılır. Elə dövlətlər var ki, bu gün də müharibə aparırlar. Onların əraziləri böyükdür və əhalisinin sayı çoxdur. İqtisadiyyatı isə güclüdür. Azərbaycan qısa müddətdə müharibəni yekunlaşdırdı. Bütün bunlar düzgün taktikanın müəyyənləşməsindən irəli gəlir. Ali Baş Komandan həm ordumuza, həm də diplomatik sahədə rəhbərlik edirdi. Ölkə başçısının dünya mediasına ardıcıl müsahibələr verirdi. Azərbaycan xalqı 44 günlük müharibə zamanı bir bayraq altında birləşdi. Dəmir yumruğun iki rəmzi var. Biri xalqın birliyi, digər isə düşmənin başını əzən yumruğu ifadə edir. Baş verənlər dosta və düşmənə mesaj oldu ki, Azərbaycan xalqı torpaqlarını çox sevir. Gələcək nəsillər üçün bu bir örnəkdir. Ordumuz və dövlətimiz var olsun!"

Telegramda izləyin