"Füzulinin azad olunması bizim üçün dönüş nöqtəsi oldu" - VƏTƏN MÜHARİBƏSİ İŞTİRAKÇISI

27 sentyabr 2020-ci ildə Ermənistan ordusunun Azərbaycan Silahlı Qüvvələrinin döyüş mövqelərini, mülki obyektləri ağır artilleriya silahlarından atəşə tutması, düşmənin cəbhəboyu hücuma keçməsi xəbəri Azərbaycan xalqının səbr kasasını daşırdı. İldırımsürətli əks-hücum əməliyyatı ilə düşmən geri oturduldu və 44 gün davam edən qanlı savaş Azərbaycan Ordusunun qələbəsi ilə başa çatdı.

Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti İlham Əliyevin 2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilməsi qərara alınmışdır.

Bu gün Vətən Müharibəsi Şəhidlərinin anım günüdür.

Vətən müharibəsi iştirakçısı Əli Əliyev Sonxeber.az- a müharibə xatirələrini danışıb:

ilk olaraq döyüşlərə hansı istiqamətdə başladınız ?

"İlk olaraq Füzuli istiqamətindən yola düşmüşdük, bilirdik ki, hələ hər şey qarşıdadır. Hər kəsin içində bir həyəcan, qarışıq hisslər vardı. Yol boyu gördüyümüz dağıntılar ürəyimizi ağrıtsa da, bir tərəfdən də bilirdik ki, azadlıq yolundayıq. Əslində, bizi irəli aparan da bu inam idi".

Döyüş yolunda ən yaddaqalan xatirəniz nə oldu ?

"Yadda qalan ən güclü anlardan biri, maşınlarımızın dayandığı vaxt idi. Hamı sakit idi, amma gözlərdəki qətiyyət hər şeydən çox danışırdı.Bir dostumuz zarafatla dedi: "Yaxşı, uşaqlar, gəldik də, indi nə edirik?" Bu cümlə o an çox sadə səslənsə də, hamı gülüşdü, çünki bilirdik ki, bu zarafatın arxasında böyük ciddilik var. Biz sadəcə irəli gedirdik, geri dönmək heç kimin ağlından keçmirdi. Yadda qalan məqamlar çox idi. Zarafatlar, çətin anlar, sevinc və kədər bir-birinə qarışmışdı. Ancaq ən çox yadımda qalan o birlik və dostluq hissi oldu.Bir məqsəd uğrunda döyüşmək və o məqsədə çatmaq – bunun necə güclü bir hiss olduğunu o dövrdə yaşadıq".

Füzulinin azad olunması bizim üçün dönüş nöqtəsi oldu:

"Füzulinin azad edilməsi bizim üçün böyük bir dönüş nöqtəsi oldu. Çünki o istiqamətdə çox ağır döyüşlərimiz oldu.Döyüşün ortasında dostlarımızın üzlərindəki ifadələri heç vaxt unuda bilmərəm – həm yorğun, həm də qürurlu. Qələbənin dadını hiss etmək möhtəşəm idi. Hər kəs bir-birinə sarıldı, torpağı qucaqladı. Elə bilirdik ki, dünya bizimdir o an.

Amma təəssüf ki, itkilərimiz də oldu.O döyüşlərdə çox yaxın dostlarımızı itirdik. Onların itkisi bizim üçün ən ağır məqamlar idi. Hər dəfə bu barədə düşünəndə, o anların ağrısı yenidən qayıdır. Amma onların ruhu bizimlə qaldı və biz onların yarımçıq qalan işini davam etdirdik".

Çiçək Sadatova

Telegramda izləyin