Aparıcının 2 yaşlı qızı ÖLDÜ: Bağça rəhbərliyini hansı CƏZA GÖZLƏYİR?

Xəbər verdiyimiz kimi, AzTV-nin əməkdaşı, aparıcı Həmid Əsədzadəyə ağır itki üz verib. H.Əsədzadənin 2 yaşlı qızı dünən Səbail rayonu ərazisində yerləşən uşaq bağçalarının birində ağır xəsarət alıb. Bildirilir ki, azyaşlı bağçada ehtiyatsızlıqdan yıxılıb və bu səbəbdən ağır yaralanıb. Hadisə Səbail rayonu İzzət Nəbiyev küçəsində yerləşən "Candy kids" adlı özəl uşaq bağçasında qeydə alınıb. Uşağın həyatını itirməsinə səbəb ürəyində yaranan problem olub.

Bəs sözügedən bağça rəhbərliyini hansı cəza gözləyir? Mövzu ilə bağlı vəkil Emil Aslanov Sonxeber.az-a açıqlama verib:

"İlk növbədə bildirim ki, məsələ ilə bağlı araşdırma başladılıb. Əgər bağçada təlimçinin azyaşlıya zərər verdiyi, vurduğu aşkar olunarsa burada Cinayət Məcəlləsinin qəsdən adam öldürmə maddəsi ilə cinayət işi açılır. Bu maddə ilə həmin şəxs doqquz ildən on dörd ilədək müddətə azadlıqdan məhrum etmə ilə cəzalandırılır. Əgər həqiqətən ehtiyatsızlıq ucbatından uşağın ölüm halı aşkar edilərs,ə bu zaman ehtiyatsızlıqdan adam öldürmə maddəsi ilə cinayət məsuliyyəti yarana bilər. Bu zaman şəxs iki ildən altı ilədək müddətə azadlıqdan məhrum etmə ilə cəzalandırılır".

Qeyd edək ki, hadisə ilə bağlı Səbail Rayon Prokurorluğu tərəfindən müvafiq ekspertizalar təyin olunub. Prokurorluq əməkdaşları hadisə yerinə baxış keçiriblər.

Sevda Səfərova

Telegramda izləyin