"Hər bir döyüşçü özündən əvvəl döyüş yoldaşını düşünürdü" - VƏTƏN MÜHARİBƏSİ İŞTİRAKÇISI

Torpaqlarımızın işğaldan azad olunması və ərazi bütövlüyünün bərpası naminə aparılmış Vətən müharibəsində minlərlə gənc qəhrəmanlıq və fədakarlıq nümayiş etdirib. Onların dastanlara sığmayan qəhrəmanlıqları nəticəsində vətənimiz düşmən tapdağındam azad edildi. Amma təəssüf ki, bu yolda itkilərimiz də çox oldu.

Ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti İlham Əliyevin 2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilməsi qərara alınmışdır.

Bu gün Vətən Müharibəsi şəhidlərinin anım günüdür.

"Cəbrayılın azad olunmasına görə", "Zəngilanın azad olunmasına görə", "Vətən müharibəsi iştirakçısı medalı" və "Vəzifə borcunu yerinə yetirdiyinə görə Fəxri Fərman" mükafatları ilə təltif olunmuş vətən müharibəsi iştirakçısı Asim Əliyev Sonxeber.az – a müharibə xatirələrindən danışıb:

"Bizim üçün hər şey Tovuz döyüşlərindən başladı. Cənab General Polad Həşimov və digər Azərbaycanın mərd oğullarının şəhadətə ucalmasından sonra bir Azərbaycan gənci olaraq öz üzərimə düşəni edib könüllü qeydiyyatdan keçdim. 27 sentyabr Müzəffər Azərbaycan Ordusunun 30 illik işğala son qoyaraq döyüş əməliyatlarına başlaması ilə mən də ordu sıralarına qatıldım. Bu mənim üçün bir qürur və fəxr idi. Çünki bu uşaq vaxtlarımızdan bizə öyrədilən vətən torpaqlarının işğal tarixinə son qoymaq üçün bir şans, gələcək nəsillərimizin alnı açıq yaşaması üçün biz gənclərin üzərinə düşən borc idi. Döyüşlərə ilk dəfə Füzuli istiqamətində başladıq. Füzuli Cəbrayıl və Zəngilan istiqamətində döyüşlərdə iştirak etmişəm. Müharibə zamanı itkilərimizin olması məni və döyüş yoldaşlarımı kədərləndirsə də, hər gün yeni azad olunmuş torpaqlarda Azərbaycan bayrağının dalğalanması bizlərə qürur hiss verirdi. Müharibə zamanı xalqımızın necə həmrəy olduğunu biz əsgərlərə isti geyimlər, ərzaqlar göndərəndə anladım. Bu bizləri daha da ruhlandırırdı, çünki bizim arxamızda bütöv, həmrəy bir xalq dayanırdı. Bir belə olsun müharibədə iştirak etdiyimdən peşman olmamışam. Ən əsası bir ömür qalacaq dostlar qazandım. İnsan gerçək dostluğu çətin anlarda qazanır. Birinin həyatı digərinə əmanət olduğu üçün hər bir döyüşçü özündən əvvəl döyüş yoldaşını düşünürdü. Əfsuslar olsun ki, 3000 dən çox şəhidimiz, ürəyi hər zaman yaralı qalan şəhid valideynlərimiz və övladlarımız var. Mən bu gün onların hər birinin qarşısında baş əyirəm. Bütün Şəhidlərimizə Allahdan rəhmət diləyirəm. Bu vətənin, xalqın onlara borcu var".

Çiçək Sadatova

Telegramda izləyin