"Cəbrayılın azad olunması xalqımızın birliyi, azadlığı və müstəqilliyinin qorunmasının parlaq bir nümunəsidir" - DEPUTAT

"Azərbaycan torpaqlarının Ermənistan tərəfindən Cəbrayıl rayonu 23 avqust 1993-cü ildə Ermənistan Silahlı Qüvvələri tərəfindən işğal olunmuşdu. İşğal dövründə rayon 1 şəhər, 4 qəsəbə və 92 kənddən ibarət idi və şəhər viran qoyulmuşdu.
27 il sonra, 2020-ci ilin 27 sentyabr tarixində başlamış İkinci Qarabağ müharibəsi ilə Ali Baş Komandanın uğurlu hərbi və siyasi rəhbərliyi altında, Azərbaycan Silahlı Qüvvələrinin minlərlə azərbaycanlını öz doğma ata-baba yurduna qaytardı, ölkəmizin qanayan yarası – Qarabağ işğaldan azad edildi, həsrətə son qoyuldu. Ölkəmizin ərazi bütövlüyü və suverenliyi məhz qətiyyətli və əzmkar lider – Ali Baş Komandan İlham Əliyevin və Silahlı Qüvvələrimizin səyi, şəhidlərimizin canı-qanı bahasına təmin edildi".

Bunu Sonxeber.az-a açıqlamasında deputat Pərvanə Vəliyeva bildirib ki, Cəbrayıl rayonunun azad edilməsi əməliyyatları çərçivəsində Azərbaycan ordusu intensiv döyüşlər apararaq bir çox kənd və strateji mövqeni geri aldı:

"Bu döyüşlər düşmənin ciddi itkilərinə səbəb oldu. 10 noyabr 2020-ci il tarixində imzalanmış üçtərəfli razılaşma Cəbrayılın tamamilə Azərbaycanın nəzarətinə keçdiyini təsdiqləmişdi. Bu razılaşma, yalnız döyüşlərin sona çatmasını deyil, həm də Azərbaycanın regional strateji mövqeyinin gücləndirilməsini simvolizə etmişdir.

Cəbrayıl rayonunun ərazisindəki qədim Xudafərin körpüsünün düşməndən azad edilməsi və Müzəffər Ali Baş Komandan İlham Əliyevin bu körpüdə Azərbaycan bayrağını ucaltması, böyük tarixi və siyasi əhəmiyyət daşıyır.
Prezident İlham Əliyevin 31 iyul 2023-cü il tarixli Sərəncamı ilə işğaldan azad edilmiş ərazilər üçün şəhər günləri təsis edilmişdir. Bu Sərəncama əsasən, 4 oktyabr Cəbrayıl şəhəri günü elan edilmişdir".

Deputat vurğulayıb ki, "Böyük Qayıdış"a dair Dövlət Proqramı çərçivəsində 2026-cı ilədək xidmət binaları, inzibati obyektlər, uşaq bağçaları, idman sağlamlıq mərkəzləri və klub-icmaların tikintisi də nəzərdə tutulur:

"Bir neçə gün öncə Cəbrayıla ilk köç karvanı yola salınmış, 36 ailə, 117 nəfər öz doğma yurduna qayıtmaq imkanı əldə etmişdir. Bu tarixi hadisə cəbrayıllıların sevincinə səbəb olmuşdur. Azad olmuş ərazilərə əhalinin köçürülməsi 2026-cı ilədək proqram çərçivəsində davam etdiriləcəkdir.

Cəbrayıl, Azərbaycanın tarixi və mədəni zənginliyi ilə tanınan ərazilərindən biridir. Şəhərin tarixi abidələri və mədəni irsi, onun qədim dövrlərdən strateji əhəmiyyət kəsb etdiyini təsdiq edir. Cəbrayıl rayonu sement, mərmər, mişar daşı və digər qiymətli tikinti materialları ilə zəngindir. Cəbrayılda musiqi, ədəbiyyat və sənət sahələrindəki inkişaf, bu regionun mədəniyyətinin zənginliyini nümayiş etdirir. Cəbrayılın inkişafı müasir dövrdə iqtisadi və sosial sahələrdə müsbət irəliləyişlər nümayiş etdirir. Şəhərin infrastrukturu, sosial xidmətləri və təhsil müəssisələri davamlı olaraq inkişaf etdirilir, sakinlərin həyat standartlarının yüksəldilməsi məqsədinə xidmət edir.

4 oktyabr bu inkişafın vurğulanması və yeni layihələrin təşviqi üçün bir platforma təqdim edir. Cəbrayılın azad olunması xalqımızın birliyi, azadlığı və müstəqilliyinin qorunmasının parlaq bir nümunəsidir".

Telegramda izləyin