Azərbaycanda 3 uşaqlı ailələr mənzillə təmin olunacaq? -AÇIQLAMA

Son illərdə bir çox ailə 1 uşaqla kifayətlənir. Bunun isə maddi durum, sağlamlıq, ev vs. kimi müxtəlif səbəbləri ola bilər. Başqa ölkələrdə 2-ci və 3cü uşağın da dünyay gətirilməsi üçün dövlət tərəfindən müxtəlif addımlar atılır. Məsələn həmin ailələr evlə təmin oluna bilir. Bəs, Azərbaycanda 3-cü uşaq dünyaya gəldikdən sonra həmin ailələrin evlə təmin olunması ilə bağlı addımlar atıla bilərmi?

Mövzu ilə bağlı Sonxeber.az-a danışan sosioloq Yusif Nəbiyev bildirdi ki, belə addımlar o ölkələrdə atılır ki, həmin ərazilərdə əhalinin sayı kəskin azalmaq üzrədir:

"Ailələrdə get-gedə daha az sayda uşağın olması artıq qlobal bir hal alıb. Xüsusən, inkişaf etmiş ölkələrdə nəinki təkuşaqlı, hətta uşaqsız ailələr belə kifayət qədərdir. Bir çox qərb ölkələrində cütlüklər ev heyvanı saxlamağa daha çox üstünlük verirlər, nəinki övlad sahibi olmaq.

3-cü dünya ölkələrində azuşaqlılığa səbəb, əsasən, ekonomik səbəblər olsa da, inkişaf etmiş ölkələrdə buna səbəb insanların daha azad və asudə həyat sürmə meylləridir. Qərb ölkələrində vəziyyət o dərəcəyə gəlib çatıb ki, bir çox ölkədə ildən-ilə əhali azalır və cəmiyyətin orta yaş həddi get-gedə qalxır.

Bu vəziyyətə qarşı mübarizə aparmaq üçün bir çox Qərb ölkələrində 2-ci və ya 3-cü övladı olanlara xüsusi imtiyazlar təklif olunur. Bu ailələrin ev almaqları, ipoteka şərtləri asanlaşdırılır. Bəzi yerlərdə aylıq maddi yardımlar və ya bir çox dövlət xidmətlərindən endirimli və ya pulsuz istifadə haqqları təmin olunur.

Amma nəzərə alınmalıdır ki, bu şeylər yalnız o ölkələrdə edilir ki, orada əhalinin kəskin azalması hiss edilir və dövlət öz resurları hesabına əhalinin artımını stimullaşdırmağa çalışır. Azərbaycan bu ölkələrdən deyil".

Sosioloq Azərbaycanda əsas diqqətin uşaqpuluna yönəlməsinin və onun bərpa edilməsi ilə bağlı müzkirələr aparılmasının lazımlılığını bildirdi:

"Ölkəmizdə az uşaqlılığın get-gedə artdığını görsək də, vəziyyətin hələ ki, kritik həddə çatdığını demək üçün hələ tezdir. Əksər cütlüklər hələ ki, minimum 2 uşaq hədəfləyir və bu da əhali sayının ən azından dəyişməz qalması üçün kifayətdir. Fakt budur ki, hələlik, əhali sayımız artmaqda davam edir, gənc nəsilimiz kifayət qədərdir və hətta gənclərin effektiv şəkildə işlə təmin olunması çətinliyimiz var. Yəni dövlətimizin önündəki daha prioritet məsələ gənclərin sayını artırmaq yox, onsuz da çox olan gənclərin keyfiyyətli məşğulluğunu təmin etməkdir.Bildiyiniz kimi, ölkəmizdə bir vaxtlar uşaqpulu verilirdi, lakin sonradan o da aradan qaldırıldı. Hazırda ev və s. kimi böyük stimullaşdırıcı təşviqlərin təmin edilməsi yox, amma aşağı gəlirli ailələri qismən də olsa maddi dəstəkləmək üçün uşaqpulunun bərpa edilməsi ehtimalı üzərində müzakirə edə bilərik".

Vüsalə İbrahimli

Telegramda izləyin

instagramda izləyin