"Laçın şəhərinin 2025-ci ildə MDB-nin mədəniyyət paytaxtı seçilməsi bizi qürurlandırdı - DEPUTAT

Xəbər verdiyimiz kimi Azərbaycan Prezidenti İlham Əliyev Rusiyada səfərdə olub. Burada o, MDB dövlət başçılarının toplantısında iştirak edib. Eyni zamanda, bir sıra ölkələrin liderlərilə görüşüb.

Bununla bağlı Sonxeber.az-a danışan deputat Cavanşir Paşazadə bildirib ki, bu gün Azərbaycan-Rusiya münasibətləri dinamik inkişafdadır".

"Cənab prezident İlham Əliyevin Rusiyaya səfəri ikitərəfli münasibətlərin daha da gücləndirilməsinə, iqtisadi-siyasi, humanitar, mədəni sahələrdə əlaqələrin dərinləşməsi baxımından da olduqca vacib idi. Bu səfəri bizim üçün daha da önəmli edən Laçın şəhərinin 2025-ci ildə MDB-nin mədəniyyət paytaxtı seçilməsi oldu. Laçın şəhərinin MDB-nin mədəniyyət paytaxtı seçilməsi bizi qürurlandırdı. Bu qərar həm laçınlılar, həm də bütün Azərbaycan xalqı tərəfindən böyük minnətdarlıqla qarşılanıb. Laçın 30 ilə yaxın müddətdə Ermənistanın işğalı altında olub. Bu müddət ərzində Laçında bütün hər şey tamamilə dağıdılmışdı. Amma bu gün Laçında yeni həyat başlayıb, keçmiş məcburi köçkünlər öz doğma yurdalarına geri qayıdıblar".

Deputat qeyd edib ki, növbəti il Azərbaycanda III MDB Oyunları keçiriləcək:

"Azərbaycan növbəti idman yarışlarına ev sahibliyi edəcək. III MDB Oyunları Gəncə şəhəri idman paytaxtına çevriləcək. Yarışlar, həmçinin Azərbaycanın 10-dan çox şəhərində keçirilək".

Deputat açıqlaması zamanı 2025-ci ildə II Dünya müharibəsinin sona çatmasının 80 illik yubileyi keçiriləcəyini də vurğulayıb:

"Azərbaycan İkinci Dünya müharibəsində qələbənin əldə olunmasında sanballı töhfə verib. Həmin dövrdə 3 milyon 400 min əhalisi olan Azərbaycandan cəbhəyə 700 minə yaxın insan yollanıb. Döyüş meydanlarında 350 min nəfər həlak olub, 130 azərbaycanlı Sovet İttifaqı Qəhrəmanı adına layiq görülüb. Müharibə illərində Azərbaycan neftçiləri cəbhəyə neft və neft məhsullarının 80 faizini, hərbi texnika üçün yağların 96 faizini tədarük edib. Bütün bunlar həmin dövrdə Azərbaycanda istehsal olunub, göstərilən məhsulların o vaxtlar SSRİ-də ümumi istehsalının faizidir. Azərbaycanda 130 növdən çox silah, sursat və texnika, o cümlədən məşhur "Katyuşalar", "Yak-3" qırıcıları istehsal edilirdi.

Bakıda 41 hərbi hospital fəaliyyət göstərirdi, 440 min yaralı müalicə alırdı. 1942-ci ilin martında, həmçinin Taqanroq adı ilə tanınan 416-cı Azərbaycan atıcı diviziyasının döyüşçüləri and içdilər və Şimali Qafqazdan başlayan döyüş yolunu Berlində başa çatdırdılar. 416-cı Azərbaycan atıcı diviziyası 1945-ci il aprelin 21-də birincilər sırasında Berlinin girəcəyinə daxil oldu. Mayın 2-də diviziyanın döyüşçüləri polkovnik Rəşid Məcidovun komandanlığı altında Qələbə Bayrağını Brandenburq darvazası üzərinə sancdılar. 9 May ümumi Qələbəmiz MDB-yə üzv dövlətlərin gələcək əməkdaşlığının mühüm amilidir. Azərbaycan bu əməkdaşlığa böyük əhəmiyyət verir və bundan sonra da qarşılıqlı fəaliyyətimizin möhkəmləndirilməsi işinə öz töhfəsini verəcək".

Telegramda izləyin