"Bu gün qızların kriminal aləmə meyilliyi oğlanlardan daha çoxdur" - AÇIQLAMA

"TikTok" sosial platformasının Azərbaycan seqmentində üz-gözü qan içində olan gənc qızın görüntüləri yayılıb. Sözügedən video izləyicilərin sərt reaksiyasına səbəb olub.Videoda gənc qızın ağlaması öz əksini tapır. Görüntülərin harada və kimlər tərəfindən lentə alındığı məlum deyil. DİN-in Mətbuat Xidmətinin əməkdaşı İbrahim Əmiraslanlı açıqlamasında bildirib ki, görüntülərlə bağlı araşdırma aparılır.

Bəs görəsən son dönəmlər gənclər, xüsusilə, məktəblilər arasında kriminal aləmə meyilliliyin artmasının səbəbi nədir?

Mövzu ilə bağlı təhsil eksperti Elşən Qafarov Sonxeber.az – a açıqlama verib:

"Çox təəssüf edici səhnədir və görünən odur ki, yenə məktəblilərdir. Bu gün cəmiyyətdə valideyinlərin övladlarından xəbərləri yoxdur. Onlar fikirləşir ki, övladına geyim alır, yemək verir, müəllimlərin yanına hazırlığa göndərir və valideyinlik missiyası bitir. Amma bu belə deyil.
Kriminal aləmə meyil nəinki oğlanlar, hətta qızlar arasında da yayılmağa başlayıb. Bu, ailədə xüsusilə qız övladlarının ərköyünləşdirilməsi və tərbiyəsinə diqqət verilməməsi ilə bağlıdır. Çox təəssüflər olsun ki, qız övladları həssas və diqqətcil olduğu üçün ailədə əksər hallarda istər ananın, istərsə də atanın bir-birinə xəyanəti, gizli həyat yaşaması onlara daha tez təsir edir və tərbiyələrində ciddi problemlər yaranmağa başlayır. Bu gün qızların kriminl aləmə meyilliyi oğlanlardan daha çoxdur. Xatırlayırsızsa, bir il bundan əvvəl Bakı şəhəri 156 saylı məktəbdə də belə bir hadisə baş vermişdi. Burda da buna bənzər hadisə baş verir. Görünən odur ki, bir-neçə qız bir qıza qarşı bu hərəkəti ediblər. Mən üzümü valideyinlərə tutub demək istəyirəm ki, ailədə övladları ilə maraqlansınlar. Onlarla söhbət etsinlər, tərbiyələrinə vaxt ayırsınlar. Övlad dünyaya gətirməklə valideyin olmağın fərqli şey olduğunu anlasınlar".

Çiçək Sadatova

Telegramda izləyin