"Belə şəxslərdən alimentin alınması onun acından ölməsini təmin etmək deməkdir" - SOSİOLOQ

2025-ci ildən bir çox istiqamətlərdə artımlar olacaq. Bəs, alimentin minimum məbləği 300 manata qədər qaldırıla bilərmi?

Mövzu ilə bağlı Sonxeber.az-a Hüquqi və Demokratik İslahatlar Mərkəzinin sədr müavini, sosioloq Elçin Bayramlı danışdı.

O, açıqlamasında qeyd etdi ki, maaşlarda lazımı artımlar olmadğı müddətcə, aliment pulunun artırılması doğru hesab olunmur:

"Artırıla bilməz. Çünki, əhalinin maaşı artırılmayıb, yalnız minimum əməkhaqqı və minimum pensiya artacaq. Bu o deməkdir ki, yalnız minimum alanların maaşında 30-40 manat artım olacaq. Məsələn, 400 manata qədər maaş alanların maaşı 400 manata çatdırılacaq. Eləcə də pensiyalar 280 manata çatdırılacaq. Ölkə əhalisindən işləyənlərin maksimum 10%-i minimum əməkhaqqı alır. Digərlərinin maaşında isə artım olmur. Bundan əlavə sözügedən artım yalnız dövlət sektoruna aiddir, özəl sektora heç bir aidatı yoxdur. Yəni, belə bir artımın olduğu şəraitdə alimentin artırılması mümkünsüzdür. Çünki, əvvəla insanların maaşları aşağıdır və alimenti də verdiyi halda özünü dolandırmaq üçün vəsait qalmır. Belə şəxslərdən alimentin alınması onun acından ölməsini təmin etmək deməkdir. Tutaq ki, 400-500 manat alan şəxsin 235 manatını aldıqda, yerdə qalan pulun məbləği yaşayış minimumundan aşağı olur və bu həmin şəxsi ağır vəziyyətə salır. Bu səbəbdən də alimentin artırılması məcburi-zorakı xarakter ola bilməz, daha yaxşı olar ki, dövlət uşaq pulu ödəsin. Alimentin artırılması üçün vətəndaşlar da normal maaş almalıdır. Məsələn minimal maaşı 1000 manat olan şəxsdən 300 hətta 400 manat aliment pulu alına bilər. Amma 400 manat maaş alan şəxsdən 250-300 manat aliment almaq mümkün deyil".

Vüsalə İbrahimli

Telegramda izləyin