Banklar bu halda "qara siyahı"da olan vətəndaşlara yenidən kredit verə bilər - AÇIQLAMA

Banklar Assosiasiyasının baş iqtisadçısı Əzizağa Haqverdiyev bildirib ki, artıq banklarda xüsusilə tutulan "qara siyahı" yoxdur.

Bəs görəsən bu "qara siyahı"da olan vətəndaşlara yenidən kreditlər verilə bilərmi?

İqtisadçı Xalid Kərimli mövzu ilə bağlı Sonxeber.az – a açıqlama verib:

"Qara siyahı" deyə bir anlayış yoxdur. Bu, xalq arasında istifadə olunan bir ifadədir. Kredit ödənişi zamanı gecikməsi olan vətəndaşlara kreditin verilib verilməməsi bankın öz səlahiyyətindədir. Mərkəzi bankın normativləri çərçivəsində bank kredit verə və ya verməyə bilər. Mərkəzi bankın normativləri isə ondan ibarətdir ki, vətəndaşın aylıq kredit ödənişi onun aylıq gəlirinin 40 faizindən çox olmasın. Xüsusi hallarda bu, 70 faizə qədər yüksələ bilər. Məsələn əgər aylıq gəliriniz 1000 manatdırsa, siz aylıq 700 manatdan çox kredit öhdəliyinin altına girə bilməzsiz. Əgər vətəndaş bu şərtlərə uyğundursa, geri qalanı bankın öz səlahiyyətindədir. Kimə verə bilər, kimə isə yox. Banklar adətən gecikmələrini aradan qaldıran, mailiyyə vəziyyəti yaxşılaşan vətəndaşlara yenidən kredit verir. Amma əgər vətəndaş bu halları aradan qaldırmırsa, ona kredit vermirlər. Mərkəzi bankın tədbirləri çərçivəsində bu qərarı qəbul etmək bankların öz səlahiyyətindədir"
Çiçək Sadatova

Telegramda izləyin