"Türkiyədə, Dubayda Azərbaycandan iş adı ilə aldadılıb aparılan qadınlar istismar olunur" - ŞOK AÇIQLAMA

Türkiyənin Sakarya vilayətinin Adapazarı rayonunda azərbaycanlı qadın öldürülüb.

Belə ki, Azərbaycan vətəndaşı 32 yaşlı Şəlalə Mirzəli Bahçivan küçəsində hərəkətdə olarkən keçmiş sevgilisi tərəfindən güllələnib. Xəstəxanaya çatdırılan qadın orada vəfat edib.
İnsidenti törətməkdə şübhəli bilinən 45 yaşlı Alaattin A. qaçsa da, polis tərəfindən saxlanılıb. Hadisə yerindən 6 giliz götürülüb.
Bildirilir ki, Şəlalə Mirzəli mağazada işləyirmiş. O, əvvəllər ailəli olub, daha sonra isə boşanaraq Alaattin ilə sevgi münasibəti yaşayıb. Hadisə o, dünən səhər saatlarında işə gedərkən baş verib.

Bu hadisə sosial şəbəkələrdə geniş müzakirələrə səbəb olub. Görəsən Azərbaycanlıların, xüsusilə, qadınların xarici ölkələrdə yaşaması onların həyatları üçün təhlükəlidirmi?

Mövzu ilə bağlı sosioloq Elçin Bayramlı Sonxeber.az – a açıqlama verib:

"Təəssüf ki, son vaxtlar işsizlik və.s səbəblərdən xaricə gedən gənclərin, əsasən qadınların sayı artıb. Kişilərin xarici ölkələrə köçməsi elə də ciddi təhlükə yaratmır, nəinki qadınların. Bir çox qadınlar müxtəlif üsullarla həmin ölkələrdə cinsi istismara, təzyiqlərə məruz qalır. Bu hadisələr xarici ölkədə baş verdiyi üçün dövlətin də müdaxilə imkanı olmur. Yalnız hadisə baş verdikdən sonra hüquqi müstəvidə dövlət öz vətəndaşının hüquqlarını qorumaq üçün cinayətin araşdırılmasını tələb edə bilər. Buna görə də bir ölkənin vətəndaşları başqa ölkələrə axın etməməlidir. Əsasən də qadınlar iş və biznes adı ilə aldadılaraq xarici ölkələrə aparılır. Getdikdən sonra isə onların sənədləri əllərindən alınır, əxlaqsızlığa məcbur edilirlər, cinsi istismara məruz qalırlar. Bu problemin qarşısını almaq üçün dövlət ölkədə sosial rifahı gücləndirilməlidir. Elə bir şərait yaradılmalıdır ki, vətəndaşlarımız xarici ölkələrdə iş axtarmağa məcbur olmasın. Təhsil üçün, təcrübə qazanmaq, müxtəlif tədbirlərdə iştirak üçün xaricə getmək olar, lakin çarəsizlikdən və işsizlikdən pul qazanmaq üçün yox. Normal ölkələrdə xarici ölkələrə iş üçün getmirlər çünki həmin ölkələrin öz əmək bazarında bütün vətəndaşların işləməsi üçün normal şərait təmin olunur. Kütləvi şəkildə insanların başqa ölkələrə iş üçün getməsi halları isə ancaq sosial təminatı aşağı olan yoxsul ölkələrdə baş verir. SSRİ dağıldıqdan sonra Azərbaycandan xarici ölkələrə kütləvi axın başladı. Təbii ki, gedənlərin arasında belə cibayətlərə qurban gedənlər də az deyil. Xüsusilə qadınlarla bağlı çox ciddi problemlər var. Türkiyədə, Dubayda Azərbaycandan iş adı ilə aldadılıb aparılan qadınlar istismar olunur. Bu çox ciddi bir problemdir. Ona görə də bununla bağlı xüsusi bir siyasət, sosial yanaşma olmalıdır ki, Azərbaycan vətəndaşları xarici ölkələrdə hüquqsuz şəkildə, çətin şəraitdə işləməyə məcbur olmasınlar. Öz ölkələrində normal işlə təmin olunsunlar".
Çiçək Sadatova

Telegramda izləyin