"Şərqi Zəngəzur və Qarabağda görülən quruculuq işləri üçün peşə təhsil müəissiələrinin məzunu olan şəxslərə ehtiyacımız var" – AÇIQLAMA

"Azərbaycanın əmək bazarında formal ixtisası olmayan şəxslərin çəkisi çoxdur".
Bunu əmək və əhalinin sosial müdafiəsi naziri Sahil Babayev parlamentin Əmək və sosial siyasət və İqtisadi siyasət, sənaye və sahibkarlıq komitələrinin birgə iclasında gələn ilin büdcə zərfinin müzakirəsi zamanı deyib.
O qeyd edib ki, Qarabağa və Şərqi Zəngəzura qayıdan vətəndaşlar arasında da ixtisaslı şəxslərin azlığı müşahidə olunur:
"Çünki uzun illər peşə təhsili seqmentini demək olar ki, itirmişdik. Məktəb bitirən şəxslərin 40 faizi ali məktəblərə daxil olurdu, lakin peşə hazırlığı çox aşağı səviyyədə idi.
Biz hazırda Elm və Təhsil Nazirliyi ilə birlikdə icra etdiyimiz proqram çərçivəsində ciddi şəkildə peşə məktəblərinin və texnikomların sayının artırılması üzərində işləyirik".

Bəs görəsən bu sahədə hansı ixtisasların inkişaf etdirilməsinə ehtiyac var?

Mövzu ilə bağlı Sosial Tədqiqatlar Mərkəzinin sektor müdiri, təhsil tədqiqatçısı Elmin Nuri Sonxeber.az – a açıqlama verib:

"Azərbaycan təhsilində son illərdə ən inkişaf etmiş istiqamətlərdən biri peşə təhsilidir. Bu istiqamətdə ciddi tədqiqatlar aparan biri kimi deyə bilərəm ki, Azərbaycanın əmək bazarında peşə təhsili müəissiələrinin rolu böyükdür. Bu ilin yayında Peşə Təhsili üzrə Dövlət Agentliyinin verdiyi yekun hesabatda peşə təhsili müəissiələrini bitirən məzunların əmək bazarındakı yerinin 20 faizə qədər artdığı bildirilib.

Bu gün Azərbaycan peşə təhsil müəissiələrində ümumilikdə 128 ixtisas tədris olunur. Peşə təhsil 3 qrupa bölünür: yüksək peşə, texniki peşə və ilkin peşə təhsili ixtisasları. Xüsusən yüksək peşə təhsili olan şəxslər demək olar ki, işsiz qalmırlar.

Əmək və Əhalinin Sosial Müdafiəsi Nazirliyinin özündə həyata keçirilən çox böyük bir layihə var ki, ora peşə təhsilli insanlar cəlb olunur və o insanlar müəyyən sosial layihələrə istiqamətləndirilir. Onlar bu layihə əsasında müxtəlif peşələri mənimsəyirlər ki, bu da sonradan həmin şəxslərin özlərinə iş tapmaqda kömək olur. Xüsusən də Şərqi Zəngəzur və Qarabağda bu gün görülən quruculuq işləri üçün bizim peşə təhsil müəissiələrinin məzunu olan şəxslərə ehtiyacımız var. Çünki, onlar həm işin nəzəri həm də praktik tərəfini mənimsəmiş şəxslərdirlər. Bizə qismət olan zəfərdən sonra başlamış quruculuq işlərimizdə onlardan faydalanmaq mütləqdir. Mən əminəm ki, Peşə Təhsili üzrə Dövlət Agentliyi sırf bu istiqamətdə öz manitorinqini aparıb, quruculuq işlərimiz üçün bizə lazım olan əsas peşələrin siyahısını hazırlayıb və bu peşələr üzrə təhsil alan məzunların kəmiyyət və keyfiyyətinə xüsusi diqqət yetirmişdir".

Çiçək Sadatova

Telegramda izləyin