"Azərbaycan COP29-a uğurla ev sahibliyi edərək tarixi nəticələr əldə etməyə müvəffəq oldu" - Emil Əkbərov

Azərbaycan BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) uğurla ev sahibliyi etməsi ölkəmizin gücünü və beynəlxalq aləmdə artan nüfuzunu bir daha sübut etdi".

Bunu Sonxeber.az-a danışan "BİG Media"MMC-nin direktoru Emil Əkbərov bildirib.

Emil Əkbərov qeyd edib ki, Bakıda keçirilən COP29-u iqlim diplomatiyasının dönüş nöqtəsi kimi də dəyərləndirmək olar.

"Beynəlxalq ictimaiyyətin yekdil dəstəyi ilə Azərbaycan COP29-a ev sahibliyi etdi. COP29 kimi mötəbər tədbirin yüksək səviyyədə keçirilməsi üçün qısa müddət ərzində lazımi bütün hazırlıqlar yüksək səviyyədə həyata keçirildi. Bu gün qürurla Bakı COP29 tədbirin ən möhtəşəm COP-lardan biri kimi tarixə düşdüyünü söyləyə bilərik.

80 dövlət və hökumət başçısının, qeydiyyatdan keçmiş 76 mindən çox iştirakçının qatıldığı COP29-un çox yaxşı təşkil olunduğunu və ölkəmizin üzərinə götürdüyü bu ağır, məsuliyyətli öhdəliyi layiqincə yerinə yetirdiyini bütün qonaqlar da təsdiqlədi".

Emil Əkbərov söyləyib ki, Azərbaycan COP29-a uğurla ev sahibliyi edərək tarixi nəticələr əldə etməyə müvəffəq oldu:

""Yaşıl dünya naminə həmrəylik" şüarını rəhbər tutan Azərbaycan bitərəf vasitəçi kimi çıxış edərək danışıqların qərəzsiz aparılması üçün lazım olan bütün imkanları və şəraiti yaratdı. Biz bütün proses boyu biz inkişaf etməkdə olan ölkələrin, xüsusilə kiçik ada dövlətlərinin və ən az inkişaf etmiş dövlətlərin ehtiyaclarını nəzərə alan nəticə əldə etməyə çağırış etdik. Çünki bu gün o dövlətlərin hər biri iqlim dəyişmələrinin ağır yükünü daşıyırlar və orada yaşayan vətəndaşlar ekzistensial təhlükə ilə üzləşirlər. Biz, həmçinin müstəmləkə idarəçiliyi ilə daha da ağırlaşan ekoloji problemlərdən əziyyət çəkən xalqlar və regionlar ilə həmrəylik nümayiş etdirdik. Azərbaycan inkişaf etmiş və inkişaf etməkdə olan ölkələr arasında dayanıqlı körpülərin qurulması üçün səylərini əsirgəmədi. Tədbirin keçirildiyi müddətdə Azərbaycan bu istiqamətdəki nailiyyətlərinə bütün dünya şahid oldu. Hətta Azərbaycanın COP29 Sədrliyi olaraq apardığı intensiv çoxtərəfli diplomatiya nəticəsində Bakı Maliyyə Məqsədi və BMT karbon bazarları üzrə əldə edilmiş irəliləyişlər gözləntiləri üstələdi.

COP29 Sədrliyi maliyyə, investisiya və ticarətin iqlim gündəliyinin mərkəzində qalmasını təmin etmək üçün BMT qurumlarını, beynəlxalq təşkilatları, çoxtərəfli inkişaf banklarını, çoxtərəfli iqlim fondlarını, özəl sektoru, vətəndaş cəmiyyətini, əsas koalisiyaları və digər maraqlı tərəfləri, həmçinin COP Sədrlikləri və Tərəfləri bir araya gətirdi. Kiçik və orta sahibkarlığın yaşıl keçidi üzrə yeni Bakı İqlim Koalisiyasını elan etdi".

Emil Əkbərov vurğulayıb ki, Azərbaycan COP29-da dünya diplomatiya tarixinə öz adını qızıl hərflərlə həkk etdirdi:

"Ancaq buna nail olmaq dünyanın inkişaf etmiş ölkələrindən - ABŞ, Avropa İttifaqı, Çin kimi qlobal aktorların qərarlarından asılı idi. Burada Azərbaycanın üzərinə düşən missiya bu cür kəskin qlobal qütbləşməyə baxmayaraq, müzakirələrin axarını ortaq mövqeyə doğru yönləndirə bilmək və məntiqi sonluğa gətirib çatdırmaq idi. Belə bir mürəkkəb maraqlar labirintinin içindən ildə 300 milyard dollarlıq maliyyə qərarı ilə çıxmaq iqlim diplomatiyasının ən üst səviyyəsi sayılmalıdır. Təəssüf ki, COP29-un keçirildiyi müddətdə ölkəmizə qarşı başladılan qarayaxma kampaniyası davam etdirildi. Amma bütün bunlara baxmayaraq cənab prezident İlham Əliyevin müdrik siyasəti və uğurlu diplomatiyası sayəsində Azərbaycan COP29-a uğurla ev sahibliyi edərək ölkəmizi ləkələməyə çalışan qüvvələrə yaxşı dərs keçmiş olduq"

Telegramda izləyin