"Lerik rayonunun qazlaşdırılmayan kəndlərinin qazlaşdırılması üçün büdcədən vəsait ayrılmasını xahiş edirəm" - DEPUTAT

"Əsaslı xərclər üçün nəzərdə tutulan xərclərin sosial və infrastruktur təyinatlı layihələrin maliyyələşdirilməsinə yönəldiriləcək məbləğində Lerik rayonunda qazlaşdırmanın davam etdirilməsi üçün də vəsaitin nəzərdə tutulmasını xahiş edirəm".

Sonxeber.az xəbər verir ki, bunu Milli Məclisin bu gün keçirilən plenar iclasında "Azərbaycan Respublikasının 2025-ci il dövlət büdcəsi haqqında" qanun layihəsinin müzakirəsi zamanı deputat Vasif Qafarov deyib.

Deputat qeyd edib ki, Lerik rayonu qışı sərt keçən və mavi yanacağa daha çox ehtiyac duyulan rayondur. Burada ilin 8 ayı qızınmaq üçün mavi yanacağa ehtiyac vardır:

"2006-cı ildə Lerik şəhəri qazlaşdırılıb. 2009-cu ildən bu yanan keçən 15 il ərazində rayonun 161 yaşayış məntəqəsindən 60-ı qazlaşdırılıb, 101-i hələ də qazlaşdırılmayıb. İldə 3,4, 5, 6, bəzi illərdə 10, 13 kənd qazlaşdırıldığı halda son illərdə bu temp ildə 1 kəndə qədər aşağı düşmüşdür.
İldə heç olmasa 5 kəndin qazlaşdırılması həyata keçirilsə, Lerik rayonunun tam qazlaşdırılması prosesi 20 ilə yekunlaşar".

Deputat vurğulayıb ki, Lerik rayonuna gələn qaz xətti üzərində yerləşən Nücü, Lərmərud, Soru, Gürdəsər, Əliabad, Bilnə, Noda kimi kəndlər, hansı ki qaz xətti bu kəndlərin 200-300 metr aralığından keçir:

"Kəndlərin 200-300 aralığından qaz kəməri keçdiyi halda bu kəndlərə qaz xəttinin çəkilməsi elə də böyük vəsait tələb etmir.Lerik əhalisinin təkidli xahişlərini ifadə edərək Lerik rayonunun qazlaşdırılmayan kəndlərinin qazlaşdırılması üçün büdcədə vəsait ayrılmasını və bu məsələnin də diqqətdə saxlanılmasını xahiş edirəm.
Bütövlükdə büdcəni təqdir edirəm və dəstəkləyirəm".

Telegramda izləyin