"COP29 ölkəmizin iqtisadiyyatı, turizm sektorunun inkişafı və tanıdılması baxımdan əvəzedilməz platforma oldu" - DEPUTAT

"COP29 Azərbaycana ev sahibliyi etibar olunan BMT tədbiridir. Dünya ictimaiyyətinin yekdil səsi ilə Azərbaycan bu tədbirə çox uğurla ev sahibliyi etdi".

Bunu Sonxeber.az-a danışan deputat Azər Badamov bildirib.

Deputat qeyd edib ki, Azərbaycanın tədbirə ev sahibliyinə qısa zaman kəsiyində hazır olmasını və dünya birliyinin ölkəmizə gələcəyini görən Qərb düşərgəsinin anti-Azərbaycan dairələri narahat olmağa başladılar. Ona görə də COP29 ərəfəsində ölkəmizə qarşı qarayaxma və qərəzli kampaniyaların şahidi olduq. Hətta COP29-un boykot olunmasına çağırışlar da səsləndirildi. Amma Azərbaycan belə siyasi təzyiqlərə fikir vermədi və beynəlxalq konfransın təyin olunduğu gündən başlayaraq qonaqları qəbul etməyə başladı. İki həftəyə yaxın davam edən COP tədbirlərinə 80-dən çox dövlət və hökumət başçısı gəldi, 76 mindən çox qonaq qeydiyyatdan keçdi. Tədbir nəzərdə tutulduğu kimi çox yüksək səviyyədə təşkil olundu və ölkəmizə gələn qonaqlar çox məmnun qaldılar. Beləliklə COP 29 uğurlu nəticələrlə başa çatdı".

Deputat vurğulayıb ki, COP29 dünya ictimaiyyəti və ölkəmiz üçün çox əhəmiyyətli oldu:

"Belə ki, qlobal iqlim dəyişiklikləri ilə bağlı COP29-un gündəliyinə müəyyənləşmiş hədəflərin icra olunmasında beynəlxalq ictimaiyyət arasında konsensus əldə olundu. Ölkəmiz əvvəlcədən məqsədimizin dünya ictimaiyyəti arasında körpülərin salınması və ümummilli məsələdə həmrəyliyə nail olunması olduğunu bildirmişdi. COP29-da iqlim maliyyəsinin artırılması və 2025-ci ildən başlayaraq bu maliyyədən istifadə olunması ilə bağlı qlobal razılıq əldə olundu. COP29 bir daha göstərdi ki, Qərbin bir neçə ölkəsi istisna olmaqla beynəlxalq ictimaiyyət üçün dünyanın gələcəyi maraqsız deyil. Biz fərqli qitələrdə və ölkələrdə yaşasaq da eyni bir dünyada yaşayarıq və qlobal problemlərin həll olunmasında həmrəyliyə nail olmalıyıq. COP29 bu məsələnin öhdəsindən uğurla gələ bildi.

COP29-un ölkəmiz üçün də əhəmiyyəti çox böyük oldu. Bu, ilk növbədə Azərbaycanın dostlarının sayının artmasına töhfə verdi. Ölkəyə gəlmiş dövlət və hökumət başçıları ilə dövlət başçımız ikitərəfli görüşlər keçirdi və ölkələrimiz arası əməkdaşlığın genişləndirilməsi imkanları müzakirə olundu. Azərbaycanın mövqeləri daha da möhkəmləndi və sözümüzün gücü artdı. COP29 Azərbaycanın hər bir səviyyəli beynəlxalq tədbirə ev sahibliyi etmək bacarığına malik olduğunu bir daha sübut etdi. O cümlədən ölkəmizin iqtisadiyyatı, turizm sektorunun inkişafı və tanıdılması baxımdan COP29 əvəzedilməz platforma oldu. COP29 ərəfəsində yüksək hazırlıq səviyyəsinə gətirilmiş şəhər infrastrukturu uzun illər xalqımızın rifahına xidmət edəcəkdir. Beləliklə qısa olaraq bildirmək istəyirəm ki, COP29 ölkəmizin özünü dünyada bir daha təsdiq etmək baxımdan gözəl fürsət oldu".

Telegramda izləyin