"Əhalinin maaşları öz dəyərini minimum 30 faiz itirib" - AÇIQLAMA

"Gələn ilin əvvəlindən başlayaraq bütün pensiyaçıların pensiyalarının sığorta hissəsi təxminən 9 faiz artacaq" - bunu Milli Məclisin Əmək və sosial siyasət komitəsinin sədri Musa Quliyev komitənin bugünkü iclasında deyib. O bildirib ki, pensiyaların minimum məbləği və minimum əməkhaqqı da yüksələcək:

"İşsizlikdən Sığorta Fondunun gələn il üçün nəzərdə tutulan büdcəsinin 55 faizi aktiv məşğulluq tədbirlərinə yönəldiləcək".

Bəs görəsən bu artım insanları qane edəcəkmi?

Mövzu ilə bağlı sosioloq Lalə Mehralı Sonxeber.az – a açıqlama verib:

"Gələn ilki büdcə, ümumi büdcə artımının 5,3 faizdir. Əgər büdcə artımı bu qədərdirsə təbii ki, sosial ödənişlərin də artımı kəskin çox ola bilməzdi. Bütün sahələrdə artım 5-10 faiz arasıdır. Bu, artırıla biləcək maksimum məbləğdir. Amma məsələyə ədalətlə yanaşsaq, son bir ildə ümumiyyətlə məhsul və xidmətlərin real infilyasiyası, bahalaşması 30 faiz təşkil edir. Əhalinin maaşları öz dəyərini minimum 30 faiz itirib. İl boyu gedən bahalaşmanın fonunda bu artım azdır. 2024-cü ilin yanvar ayından dekabr ayına qədər market, bazar qiymətləri nə qədər dəyişib? Yanvar ayında nəyi neçəyə alırdıq, dekabrda nəyi neçəyə alırıq? Bu bahalaşmanın fonunda insanlar narahatdırlar ki, həyat güzəranları ilə bağlı problemlər yaranacaq. Növbəti ildən də bahalaşmalar dayanmayacaq. Yenə ərzaq və xidmət məhsullarında bahalaşmalar davam edəcək. Bu bahalaşmanın fonunda insanlar artımla qane olmurlar. Çünki, gəlir gedənə adekvat deyil. Bu baxımdan insanlar haqlı olaraq narahat olur ki, əgər bahalaşma dayanmasa bu pensiya ilə həyat güzəranı necə olacaq. Ümid edək ki, bu artımdan sonra bahalaşmada müəyyən qədər durğunluq yaşansın. İnsanlar ən azından xərcləri ilə gəlirlərini balanslaşdıra bilsinlər".

Çiçək Sadatova

Telegramda izləyin