Əsədin Dəməşqdən qaçmasının yeni TƏFƏRRÜATLARI

Suriya prezidenti Bəşər Əsəd Rusiya kəşfiyyat xidmətlərinin köməyi ilə ölkəni tərk edib, vəziyyətlə tanış olan mənbələr bildiriblər.

Lent.az bildirir ki, "Bloomberg"in məlumatına görə, qaçmaq qərarı Moskva ilə məsləhətləşmələrdən sonra qəbul edilib və Əsədə üsyançılara qarşı mübarizədə qaçılmaz məğlubiyyət barədə xəbərdarlıq edilib.

Suriyada vəziyyətin sürətlə pisləşməsindən xəbər tutan Rusiya prezidenti Vladimir Putin xüsusi xidmət orqanlarından Əsədin hakimiyyətinə təhlükənin niyə vaxtında müəyyən edilmədiyini izah etməyi tələb edib. Mənbələr bildirir ki, Kreml Suriya lideri və onun ailəsinə təhlükəsizlik zəmanəti və ölkəni dərhal tərk edəcəyi təqdirdə nəqliyyat təklif edib.

Qaçışın təşkili Rusiya kəşfiyyatına həvalə edilib. İnsayderlərin dediyinə görə, Əsəd və ailəsi Suriyadakı Rusiya aviabazasından keçərək transponderi ayrılan təyyarə ilə çıxarılıb və bu, onun izlənilməsinin mümkünlüyünü istisna edib.

Bu arada "Əl-Ərəbiyyə" suriyalı mənbələrə istinadən xəbər verir ki, qaçışdan yalnız Əsədin həyat yoldaşı və uşaqları xəbər tutub. Onun yaxın çevrəsinin bir neçə üzvü, o cümlədən qardaşı Mahır və əmisi oğlu Rami Maxlouf itkin düşüb. Raminin kiçik qardaşı İhab Maxluf Livanla sərhədi keçmək istəyərkən üsyançılar tərəfindən öldürülüb və ondan 8 milyon dollar tapılıb.

Rusiya xarici işlər nazirinin müavini Sergey Ryabkov Bəşər Əsədin Rusiyada təhlükəsiz olduğunu təsdiqləyib. Əsədin Beynəlxalq Cinayət Məhkəməsinə ekstradisiyasının mümkünlüyü ilə bağlı sualı cavablandıran Ryabkov xatırladıb ki, Rusiya Roma statutunu ratifikasiya etməyib.

Eyni zamanda, Kreml Suriya üsyançıları ilə əlaqə saxladığını elan edərək, bölgədəki bazalarını və diplomatik nümayəndəliklərini qorumaq prioritetini vurğulayır. "Financial Times" qeyd edir ki, Rusiya daha az əhəmiyyətli forpostlardakı mövcudluğunu azaltsa da, əsas dəniz və hava bazalarını saxlamağa davam edir.

Telegramda izləyin