"Mötəbər tədbirlərin keçirilməsi və tarixi qələbələr onu göstərir ki, Azərbaycan Beynəlxalq idman məkanına çevrilir" - DEPUTAT

Azərbaycan Beynəlxalq idman məkanına çevrilir. Hər il olduğu kimi, Azərbaycan idmanı üçün 2024-cü il də uğurlu il olmuşdur. Azərbaycan idmançıları beynəlxalq yarışlarda ölkəmizi ləyaqətlə təmsil etmişlər və 1700-ə yaxın medal qazanılmışdır. Bu, onu göstərir ki, idmanımız inkişaf edir, yeni nəsil idmançılar yetişir və beləliklə, Azərbaycan idman dövləti kimi öz gücünü müxtəlif beynəlxalq yarışlarda təsdiqləyir. Xüsusilə gənc nəslin yetişdirilməsi və vətənpərvərlik hisslərinin gənc nəslə aşılanması üçün idman amili çox böyük məna daşıyır. İdman cəmiyyətimizin ayrılmaz hissəsidir. İdmanın və idman qələbələrinin ictimai məkanda çox böyük rolu var.

2024-cü ilin ən böyük yarışı Yay Olimpiya Oyunları idi. İdmançılarımız burada da tarixi nəticə əldə etmişdir. Qeyd edim ki, Azərbaycan müstəqil ölkə kimi 1996-cı ildən Olimpiya Oyunlarında iştirak edir və bu dəfə komanda hesabında Azərbaycan 30-cu yerdə qərarlaşmışdır. Bunu idmanımız üçün ən yüksək nəticə hesab etmək olar. Bildirim ki, bütövlükdə iki yüzdən çox milli komanda Olimpiya Oyunlarında iştirak edir, onların arasında 30-cu olmaq çox böyük nailiyyətdir. Xüsusi vurğulayım ki, müsəlman ölkələri arasında Azərbaycan üçüncü yerdə idi. Nəzərə alsaq ki, dünyada 60-a yaxın müsəlman ölkəsi var, bu da böyük və tarixi nailiyyətdir. Komandamız ikisi qızıl, ikisi gümüş, üçü bürünc olmaqla yeddi medal qazanaraq ölkəmizin idman şöhrətini bir daha yüksəklərə qaldırmışdır.

   Bakı şəhərində gənclərimiz idmanla məşğul olmaq üçün müasir idman infrastrukturlarımız vardır. Hazırda, mötəbər tədbirlər keçirmək üçüm təxminən 10 il bundan öncə Olimpiya Stadionu inşa edilmişdir. Paytaxtla yanaşı, bölgələrimizdə 44 Olimpiya İdman Kompleksi fəaliyyət göstərir və işğal altından azad edilmiş bölgələrdə də idmanın kütləviliyinin artırılması üçün yeni Olimpiya İdman Komplekslərinin açılması nəzərdə tutulmuşdur.   

Hər birimizə məlum olduğu kimi, 2025-ci ildə üçüncü MDB Oyunları Azərbaycanda keçiriləcək. Azərbaycan növbəti böyük idman yarışına ev sahibliyi edəcəkdir. Yarışların keçirilməsi üçün 14 şəhər seçilibdir və əsas oyunlar Gəncə şəhərində keçiriləcəkdir. Gəncə ölkəmizdə ikinci ən böyük və tarixi əhəmiyyətə malik qədim şəhərdir. Beləliklə, Gəncə şəhəri MDB Oyunlarının mərkəzi olacaqdır. Hazırda, Gəncə şəhərində  yeni stadion inşa edilir və Oyunlara qədər istismara veriləcəkdir. Eyni zamanda, bir neçə ay bundan əvvəl Gəncə şəhərində ölkəmizin böyük Olimpiya İdman Kompleksi açılmışdır. 

Qeyd edim ki, ölkəmizdə demək olar ki hər il belə mötəbər tədbirlərin keçirilməsi və tarixi qələbələrin əldə olunması onu göstərir ki, Azərbaycan Beynəlxalq idman məkanına çevrilir.

Şahin Seyidzadə

Milli Məclisin deputatı

Telegramda izləyin