"Ərdoğan və Əliyevin şəxsi dostluğu ilə də Türkiyə və Azərbaycan əlaqələri əsl qardaşlıq nümunəsinə çevrilmişdir" - DEPUTAT

"Türkiyə-Azərbaycan münasibətlərinin möhkəmləndirilməsində Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyevin çalışmaları tarixi əhəmiyyətə malikdir. Hər iki dövlət başçısı "Bir millət, iki dövlət" prinsipinə sadiq qalaraq, iki qardaş ölkə arasında strateji tərəfdaşlığı ən yüksək səviyyəyə qaldırıb".

Bunu Sonxeber.az-a danışan deputat Razi Nurullayev bildirib.

Deputat qeyd edib ki, Rəcəb Tayyib Ərdoğanın açıq dəstəyi, xüsusilə 2020-ci il Vətən müharibəsi zamanı Azərbaycanın haqq işinə göstərdiyi siyasi, mənəvi və diplomatik köməklə özünü büruzə verdi:

"Ərdoğan həm beynəlxalq arenada Azərbaycanın mövqeyini dəstəkləmiş, həm də Türk xalqının Azərbaycanla həmrəyliyini nümayiş etdirmişdir.

Eyni zamanda İlham Əliyev Türkiyə ilə münasibətlərin qurulmasında uzaqgörən siyasəti ilə Türkiyə ilə əməkdaşlığı daha da dərinləşdirib. TANAP və TAP kimi enerji layihələri, hərbi əməkdaşlıq, birgə təlimlər və diplomatik uğurlar, həm Azərbaycanın, həm də Türkiyənin uğurlarıdır. Bu əməkdaşlıq təkcə regional deyil, həm də qlobal əhəmiyyət kəsb edir.

Ərdoğan və Əliyevin şəxsi dostluğu ilə də Türkiyə və Azərbaycan əlaqələri sadəcə tərəfdaşlıq deyil, həm də əsl qardaşlıq nümunəsinə çevrilmişdir. Bu münasibətlər zamanın sınağından keçmiş və gələcəkdə də daha da güclənərək hər iki xalqın rifahına xidmət edəcəkdir".

Telegramda izləyin