"Ölkənin yeganə aktiv, böyük potensialı olan ərazisi Bakıdır" - AÇIQLAMA

"Ölkənin yeganə aktiv, böyük potensialı olan ərazisi Bakıdır" - bunu Sonxeber.az - a açıqlamasında sosioloq Elçin Bayramlı bildirib.

"Bütün rayonlardan yalnız bir istiqamətə - Bakıya doğru axın davam edir. Regionlar, kəndlər boşalır. İş, biznes, yaşayış şərtləri baxımından ən əlverişli şəhərin yalnız Bakı olması insanların bura kütləvi axınına səbəb olur. Təəssüf ki, bu prosesin dolayı olaraq başqa nəticələri də olur. Məsələn həkimlər çalışır ki, Bakı və ətrafında işləsinlər. Çünki, burda pasientlər daha çoxdur, daha imkanlıdır. Əlaqə imkanları genişdir. Məhz bu səbəblərdən ölkənin ən peşəkar həkimləri Bakıda toplaşıb. Uzaq regionlardan vətəndaşlar Bakıya gəlməli olur. Çünki, rayon xəstəxanalarında həkim tapılmır. Düzdür, regionlarda da çox yaxşı həkimlərimiz var, lakin onların sayı çox azdır. Belə bir şəraitdə artıq ciddi problemlər yaranır. Bütün yük paytaxtın üzərinə düşür. Burda yaşamaq, nəqliyyatda hərəkət etmək mümkün olmur. Kommunal sistemlər davam gətirmir. Beləcə, Bakı yaşanılmaz hala gəlir. Bunların səbəbi çox standartdır. Regionlar məhv olub gedir. İnkişafdan başqa yol yoxdur. Ölkənin tarazlı inkişafı üçün balans yaradılmalıdır. Demoqrafik, sosial, iqtisadi balans bütün rayonlarda təmin olunmalıdır. Normal yaşayış və iş şərtləri yaradılmalıdır. Bunlar olmayanda əlbəttə ki, bütün əhali paytaxta cəmləşəcək. Son dövrlər problemin həlli üçün nəinki, addımlar atılmır, hətta atılan addımlar əhalinin Bakıya toplaşmasını stimullaşdırır.

Hal-hazırda, nəinki, Bakıda, hətta ətraf kənd və qəsəbələrdə də tıxaclar yaranır. Bu belə olmamalıdır. Paytaxtdan ibarət ölkə olmur. Bu fundamental problemdir. Heç kəsi qınamaq da olmaz. Bu, yalnız aparılan sosial iqtisadi siyasətin nəticəsidir. Bu siyasət elə qurulmalı idi ki, ölkənin bütün rayonları bərabər inkişaf etsin. Hər kəs öz bölgəsində yaşasın. Amma biz iqtisadi statistikalara baxdıqda görürük ki, ölkə əhalisinin 3/4-ü Bakıda formalaşlb".

Çiçək Sadatova

Telegramda izləyin