Mənimsəmədə ittiham olunan Niyam Salami: "Oğurluğun üstü açılıb, məni artıq boğaza yığıblar"

Adı 21 min 800 manat dəyərində kömür məhsulunu mənimsəməkdə ittiham hallanan müğənni Niyam Salami hadisənin təfərrüatı ilə bağlı danışıb.

O, Oxu.Az-a açıqlamasında bildirib ki, "My Beach"restoranının anbardarı mühasiblə əlbir olub onu şərləməyə çalışırlar.

"Həmin restoranın anbardarı vəzifəsində çalışan Fəxrəddin adlı şəxsi ora mən gətirmişdim, mənim işçim idi. Yəni restoranın indiki rəhbəri Məhərrəm Novruzovun işçisi deyildi. Hər gün toy olan obyektlər var heç onlar kömürə 22 min manat pul vermirlər. Sən kimsən ki, gətirib 22 minlik malı ora töküb getmisən? Fəxrəddinlə mühasib əlbir olub belə bir oğurluq ediblər. İndi isə həmin oğurluğun üstü açılıb.

Məni artıq boğaza yığıblar. İstəmirəm o Məhərrəmin gördüyü işləri açım danışım. Mən desəm, onun evi yıxılar. Bütün bu işləri qarışdıran oranın müdiri Məhərrəm Novruzovdur. Duzlu gölün yanında, "Qurtuluş"da camaatın başına oyun gətirilən də, orada yaşayan insanların qazını kəsən də o insandır. Soruşan da yoxdur ki, işlətdiyin camaatın pulunu niyə vermirsən? Niyə mənim adımı çəkirsən?" - deyə N.Salami bildirib.

14:30

Müğənni Niyam Salami Sumqayıt şəhər sakini E.Abbəkirovun 21 min 800 manat dəyərində kömür məhsulunu mənimsəmədə ittiham olunur.

Oxu.Az xəbər verir ki, bu barədə müğənni Teleqraf.com-a açıqlama verib.

O bildirib ki, VÖEN hesabı onun adına olduğu üçün hər şeyi onun üzərinə atıblar:

"Restorana gətirilən ən bahalı ərzaq ətdir. Bir gündə restorana 5-8 min manat dəyərində ət gətirilir. Necə olar bilər ki, restorana 21 min 800 manat dəyərində kömür gətirilsin?! Bu qədər kömürü restorana kim gətirə bilər?! Niyam Salami bir dəfə də olsun kömür satanı görməyib. Mən onda səhv etdim ki, adıma VÖEN açdırdım. VÖEN adıma olduğu üçün hər şeyi üzərimə atdılar".

Niyam Salami günahın iddiaçıda olduğunu deyib:

"Sənin pulunu kimsə vermirdisə, o zaman mənə müraciət edərdin. Kabinetdə otururdum, məni tapmaq çətin deyildi. Bildirərdin ki, Niyam bəy, sizin adınıza restorana mal gətiririk, başımıza belə oyun açırlar. Həmin vaxt məsələni həll edərdim. Mən restorandan gedəndən sonra deyirlər ki, Niyam Salami 21 min 800 manat pul borcludur. Bu, reallıq deyil. Kömür satana heç kim inanmasın. Restoranın sahibinə gücləri çatmır.

Mən restorandan uzaqlaşandan sonra tədricən müflis olmağa başladılar. Restoranın VÖEN-i mənim adıma olduğu üçün bütün borcları üzərimə atdılar. VÖEN adıma olduğu üçün mən balamın boğazından kəsib, məcbur olub, yavaş-yavaş pulları ödəyirəm".

10:26

Müğənni Niyam Salami bir nəfəri aldadaraq 21 800 manat dəyərində malını mənimsəmədə ittiham olunur.

Oxu.Az-ın məlumatına görə, Sumqayıt şəhər sakini E.Abbəkirov 2023-cü ilin avqust ayında Novxanı qəsəbəsində yerləşən restoranın icarədarı Niyaməddin Səfərovun (müğənni Niyam Salami - red.) ondan 21 800 manat dəyərində kömür alıb pulunu verməməsini bildirilib.

Faktla bağlı araşdırma aparılır.

Telegramda izləyin