Bəhruz Quliyev: "20 Yanvar hadisələri müstəqillik tarixinin başlanğıcıdır"

"Azərbaycan xalqının tarixinə Qanlı Yanvar faciəsi kimi daxil olmuş 1990-cı il 20 Yanvar hadisələrindən artıq 35 il keçir. Keçmiş Sovet Ordusunun həmin gün Azərbaycan xalqına qarşı həyata keçirdiyi hərbi təcavüz insanlığa qarşı törədilmiş ən ağır cinayətlərdən biri kimi tarixdə qalacaq. Həmin gün Azərbaycan tarixində qanla yazılmış bir səhifədir, ancaq təkcə faciə deyil, eyni zamanda bu tarix Azərbaycan istiqlal yolunun ilk zirvəsi, milli məfkurəmizin azadlıq istəyinin oyanış günü idi".

Bu fikirləri Sonxeber.az-a açıqlamasında SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev deyib.

Onun sözlərinə görə, həmin gün Sovet ordusu Azərbaycana, Bakıya və digər bölgələrə daxil olaraq qətliamlar törətdi: "Bu qətlimalar SSRİ-nin süqutunu sürətləndirməklə, Azərbaycanın müstəqilliyini yaxınlaşdırdı. Bir daha bizə aydın oldu ki, imperiyanın tərkibində yaşaya bilmərik. Bu imperiya işğalçılıq maraqlarını qoruyur, işğalçıya dəstək verir. Ona görə də bu hadisə Azərbaycan xalqının tarixində bir başlanğıc nöqtəsi idi. Yəni, insanlar nahaqda yerə şəhid olmadılar. Müstəqillik yolunda atılmış çox vacib addım idi. Düzdür, SSRİ-də başqa ölkələrdə də belə toqquşmalar olmuşdu amma ən dəhşətlisi, həcminə görə ən böyük hadisə məhz Azərbaycanda baş verdi. Azərbaycandakı hadisəyə görə müxtəlif reaksiyalar oldu və bu da imperiyanın süqutunu sürətləndirdi. Bu hadisələrin dünya tarixində önəmli rolu oldu. Amma yenə də şəhidlər verdik, itkilərimiz çox olsa da, şərəfli gündür. Biz bu şərəfli günü əbədiyyətə qədər yaşadacağıq".

Bəhruz Quliyev əlavə edib ki, 20 Yanvar hadisələri müstəqillik tarixinin başlanğıcı kimi səciyyələndirilir: "Şəhidlərimiz canlarından əbəs yerə keçməyiblər, bizim üçün yeganə təsəlli Qələbəmizdir. Bu gün Azərbaycan qalib ölkədir! Ölkəmiz işğal olunmuş torpaqlarımızı öz silahının gücünə, ordumuzun və Ali Baş Komandan, Prezident İlham Əliyevin güclü iradəsi hesabına azad edib. Azərbaycan xalqı öz Prezidentinin, rəşadətli ordusunun ətrafında birləşərək, 44 gün ərzində düşməni torpaqlarımızdan qovdu".

Telegramda izləyin