"Valideyinlər övladlarının sosial şəbəkədəki fəaliyyətlərinə nəzarət etmirlər" - AÇIQLAMA

Son zamanlar məktəblilərin TikTok sosial platformasında etdikləri paylaşımlar müzakirə edilir. Belə ki, TikTok artıq şagirdlər arasında da böyük populyarlıq qazanıb. Lakin bu platforma bəzən milli-mənəvi dəyərlərə zidd davranışların yayılmasına səbəb olur. Vəziyyət o həddə çatıb ki, hətta dərs zamanı belə, şagirdlər canlı yayımlar açır, etik olmayan ifadələr səsləndirir.

Bəs görəsən bu halların qarşısını almaq üçün hansı addımlar atılmalıdır?

Mövzu ilə bağlı təhsil eksperti Elşən Qafarov Sonxeber.az - a açıqlama verib:

"Sosial şəbəkələr bizdə deyil, bütün dünyada var. Bir sıra ölkələr TikTok-u qadağa edirlər. Amma düşünürəm ki, məsələnin həlli yolu bu deyil. Əgər bu gün ölkədə TikTok-u bağlaya bilmiriksə, ən azından bir sıra digər ölkələrdə olduğu kimi müəllimlər özləri də Tiktokda aktiv olmalıdır. Onlar özləri bu platformada maarifləndirici videolar paylaşa bilərlər. Ümumiyyətlə, bu məsələ cəmiyyət problemidir. Həm valideyinlər, həm müəllimlər nəzarət etməlidirlər. Amma təəssüflər olsun ki, bizdə ailə insitutunda ciddi boşluqlar var. Valideyinlər övladlarının sosial şəbəkədəki fəaliyyətlərinə nəzarət etmirlər. Bu da bütün problemlərin yaranmasına səbəb olur. Hal-hazırda Təhsil Nazirliyi elan edib ki, 300 məktəbdə şagirdlərin telefon gətirməsi qadağan edilib. Amma hansı məktəblərdə? Həmin məktəblərin adları yoxdur. Bununla bağlı rəsmi əmr yoxdur. Ən əsası problemin həlli üçün qadağalardansa, maarifləndirmə işlərini gücləndirmək lazımdır. Xüsusilə valideyinlər nəzarəti gücləndirməlidir. Məktəblərdə tərbiyə sistemi çöküb. Çünki, təhsili idarə edənlərin təhsil sistemindən xəbərləri yoxdur. Onlar düşünür ki, əgər bizim olimpiyadalarda medallarımız varsa, deməli təhsildə hərşey yaxşıdır. Amma reallıq bundan ibarət deyil. Bunlar hamısı təhsilin idarə edilməsinin səriştəsi olmayan insanlara tapşırılmasının acı nəticəsidir".

Çiçək Sadatova

Telegramda izləyin