Azərbaycandan uçan ər-arvadın baqajında hind tanrılarının suvenirləri aşkarlandı

Rusiyanın Həştərxan hava limanında gömrükçülər Hindistandan Azərbaycan üzərindən gələn ər-arvadın baqajında hind suvenirlərinin partiyasını aşkar ediblər. Suvenirlər ümumi çəkisi 90 kq-dan çox olan iki çamadana yığılıb.

Lent.az Rusiya mediasına istinadla bildirir ki, Kalmıkiya Respublikasından olan yerli sakin Həştərxanda biznes fəaliyyəti ilə məşğuldur. Onun sözlərinə görə, o, Hindistanda Şiva, Krişna, Tara, Kali, Lakşmi, Qaneşa və Budda da daxil olmaqla tanrıların metal heykəlcikləri, eləcə də digər suvenirlərdən cəmi 206 ədəd alıb.

Kişi bu malları öz mağazasında satmağı planlaşdırıb. Lakin o, alış-veriş üçün qəbzləri təqdim etməyib. Ekspertlərin fikrincə, bütün göndərişin dəyəri 500 min rublu keçir, mağazada isə 800 min rubla çata bilər.

Qeyd olunur ki, bəyannamə olmadan yalnız şəxsi istifadə üçün nəzərdə tutulan malların gömrük sərhədindən keçirilməsinə icazə verilir. Alıcı bəyannamə doldurmalı, mallar üçün sənədlər təqdim etməli və gömrük rüsumlarını ödəməli idi, lakin o, bunu etməyib. Mallar məhkəmənin qərarına qədər həbs edilib.

Malları bəyan etmədiyinə görə sərnişinlər barəsində inzibati iş başlanıb.

Telegramda izləyin