Rəcəb Tayyib Ərdoğan haqqında ilk xəbərin yer aldığı qəzet hərracda satışa çıxarılır

Türkiyə Prezidenti Rəcəb Tayyib Ərdoğan haqqında ilk xəbərin yer aldığı ehtimal edilən qəzet nüsxəsi hərrac yolu ilə satışa çıxarılır.

Bu barədə Oxu.Az Sondakika.com-a istinadən xəbər verir.

Məlumata görə, 17 yanvar 1972-ci il tarixli "Bizim Anadolu" qəzeti yanvarın 19-da yerli vaxtla saat 15:00-da Çengelköy Müzayede (Çengelköy Hərracı - red.) tərəfindən hərraca çıxarılacaq.

Qəzet üçün başlanğıc qiyməti hələ müəyyən edilməsə də, satışdan ən azı 250 min lirə (təxminən 12 min manat) gəlir əldə edilməsi gözlənilir.

Bildirildiyinə görə, "Bizim Anadolu" qəzetində 53 il əvvəl Rəcəb Tayyib Ərdoğan və iki məktəb yoldaşının "Liseylərarası debat"a qatılmaları və birincilik qazanmaları ilə bağlı fotoreportaj oxuculara təqdim edilib. Xəbər "İstanbul İmam Hatip Okulu fikir mübadiləsində qalib gəldi" başlığı ilə verilib.

Həmçinin, xəbərdə Ərdoğanın "Türk və islam mədəniyyətini övladlarına aşılayan ana və ataları axtarırıq" sözlərinin böyük alqışlarla qarşılandığı da qeyd edilib.

Hərracın koordinatoru Osman Nuri Boyacının sözlərinə görə, Ərdoğan haqqında bu xəbərdən əvvəl hansısa başqa bir xəbərin dərc edilməsi çox da mümkün görünmür.

"Həmçinin, 1972-ci ildə 18 yaşında olan Ərdoğanın bir lisey şagirdi olaraq xəbərdə yer alması onun həyatında iz buraxan bir mövzu kimi qiymətləndirilə bilər. Qəzet nüsxəsinin başlanğıc qiymətini hələ ki təyin etməmişik, amma ən azı 250 min lirəyə satılarsa, buna şad olardıq", - deyə Osman Nuri Boyacı qeyd edib.

Boyacı əlavə edib ki, bu xəbərin "Bizim Anadolu" qəzetindən başqa bir nəşrdə dərc olunub-olunmadığı da araşdırma mövzusu ola bilər.

Telegramda izləyin