"BakıKart" tətbiqi nə vaxt işləyəcək? - AÇIQLAMA

2024-cü ilin avqust ayının əvvəlindən etibarən "BakıKart" mobil tətbiqində texniki nasazlıqlar müşahidə olunmağa başlanıb. Bu səbəbdən istifadəçilər tətbiq vasitəsilə balans yükləmək və digər funksiyalardan yararlanmaqda çətinliklərlə üzləşiblər. Azərbaycan Yerüstü Nəqliyyat Agentliyi (AYNA) yaranmış problemin aradan qaldırılması istiqamətində işlərin aparıldığını bildirərək sərnişinlərə müvəqqəti olaraq "BakıKart" kartlarından və mövcud digər alternativ ödəniş üsullarından istifadə etməyi tövsiyə edib.

Ötən ilin sentyabrında AYNA tərəfindən verilən açıqlamada texniki nasazlığın hələ də davam etdiyi və problemin həlli üçün işlərin sürdüyü qeyd edilib. Noyabr ayında isə Rəqəmsal İnkişaf və Nəqliyyat Nazirliyinin rəsmisi Elmin Məmmədov yaxın günlərdə daha təkmil "BakıKart" proqramının istifadəyə veriləcəyini söyləyib.

Lakin 2025-ci ilin yanvar ayına qədər "BakıKart" mobil tətbiqinin fəaliyyəti hələ də bərpa olunmayıb. Rəsmi internet səhifəsində "Yenilənmiş BakıKart mobil tətbiqi - Tezliklə..." məlumatı yer alır.

Tətbiqin nə zaman hazır olacağı ilə bağlı AYNA-dan Metbuat.az-ın sorğusuna cavab olaraq bildirilib ki, bu barədə informasiya olanda, təqdim ediləcək. Belə çıxır ki, qurum özü də tətbiqin bərpası istiqamətində gedən işlər barəsində məlumatlı deyil.

Qeyd edək ki, bu müddət ərzində sərnişinlər ödənişləri "BakıKart" kartları və digər alternativ üsullarla həyata keçirməyə davam edirlər.

Telegramda izləyin