Ana Kəmalə Ağazadəni TƏHDİD ETDİ: Uşaq dövlət müəssisəsinə verildi

Ananın dayənin yanında unutduğu, sığınacağa yerləşdiriləndən sonra intiharla təhdid edərək geri almaq istədiyi körpə artıq Azərbaycan Uşaqlar Birliyindən çıxarılıb.

Bu barədə Oxu.Az-a açıqlamasında Azərbaycan Uşaqlar Birliyinin sədri Kəmalə Ağazadə deyib.

Onun sözlərinə görə, uşaq artıq bir neçə gündür, dövlət müəssisəsinə yerləşdirilib.

"Ana ilə bağlı isə hüquq-mühafizə orqanları tərəfindən profilaktik iş aparılır", - K.Ağazadə bildirib.

Xatırladaq ki, bir neçə gün öncə Azərbaycan Uşaqlar Birliyinin sədri Kəmalə Ağazadə özünün "Facebook" hesabından paylaşım edərək bildirmişdi ki, bir il öncə ana ikiyaşlı övladını dayənin yanına qoyaraq gedib və onunla 28 gün ərzində əlaqə saxlamayıb. Onun sözlərinə görə, dayə uşağın anasından xəbər çıxmadığını görəndə vəziyyətlə bağlı Azərbaycan Uşaqlar Birliyinin qaynar xəttinə müraciət edib. Bundan sonra polis əməkdaşlarının iştirakı ilə uşaq sığınacağa yerləşdirilib. Lakin bundan sonra naməlum şəxslər Kəmalə Ağazadəyə mesaj yazaraq uşağı anaya qaytarmayacaqları təqdirdə ananın intihar edəcəyi ilə hədələyiblər.

Telegramda izləyin