"Nəqliyyat və kommunikasiyalar sahəsində əməkdaşlıq Azərbaycan və Pakistan üçün strateji əhəmiyyət daşıyır" - DEPUTAT

"Azərbaycan və Pakistan tarixən sıx dostluq və qardaşlıq münasibətlərinə malikdir və bu münasibətlər həm siyasi, həm iqtisadi, həm də hərbi sahələrdə inkişaf edir. Pakistan və Azərbaycan arasındakı münasibətlər yalnız diplomatik tərəfdaşlıqdan ibarət deyil, eyni zamanda dərin tarixi, mədəni və dini bağlara əsaslanan qardaşlıq münasibətləridir. Pakistan 1991-ci ildə Azərbaycanın müstəqilliyini ilk tanıyan dövlətlərdəndir".

Bunu Sonxeber.az-a danışan Milli Məclisin deputatı Vasif Qafarov bildirib.

Deputat qeyd edib ki, iki qardaş ölkə dövlətlərimizin ərazi bütövlüyü və suverenliyi məsələsində həmişə bir-birini qarşılıqlı surətdə dəstəkləyib, bu gün də dəstəkləyir:

"Ermənistan Azərbaycan ərazilərini işğal etdiyinə görə Pakistan onunla diplomatik əlaqələr qurmayıb. Pakistan Qarabağ məsələsində həmişə Azərbaycanın haqq işini dəstəkləyib. Eyni zamanda, Azərbaycan da Kəşmir məsələsində hər zaman Pakistanı dəstəkləyib. Azərbaycan və Pakistan iki qardaş ölkə olaraq beynəlxalq münasibətlərin bütün məsələlərində həmişə bir-birinə dəstək verib və bu dəstəyi davam etdirirlər. Azərbaycan və Pakistan arasında əlaqələrin inkişafı və genişlənməsi hər iki ölkənin maraqlarına cavab verir. Azərbaycan və Pakistanın strateji tərəfdaşlıq səviyyəsində münasibətləri regional və qlobal sabitlik üçün də əhəmiyyətli rol oynayır. Pakistan İslam Respublikasının Baş naziri Məhəmməd Şahbaz Şərifin Azərbaycana dövlət səfəri ölkələrimiz arasında qardaşlıq əlaqələrini daha da gücləndirəcək.

Bu səfər çərçivəsində ticarət, enerji, müdafiə sənayesi və nəqliyyat sahələrində əməkdaşlığın genişləndirilməsi ikitərəfli gündəliyin əsas mövzularıdır. Xüsusilə nəqliyyat və logistika sahəsində əlaqələrin inkişafı iki ölkə üçün yeni iqtisadi imkanlar yarada bilər. Azərbaycan və Pakistan arasında iqtisadi, ticari, enerji, müdafiə, nəqliyyat və digər strateji sahələri əhatə edən 10-dan çox sazişin imzalanması iki ölkənin müxtəlif sahələrdə daha sıx əməkdaşlıq etməyə hazır olduğunu göstərir".

Deputat vurğulayıb ki, xüsusilə sərmayə planları və ticari dövriyyənin artırılması məsələsi diqqətçəkicidir. Pakistan və Azərbaycanın ticarət əlaqələrində müsbət dinamika hiss edilsə də, bu sahədə potensial böyükdür və bu istiqamətdə görüləcək işlər də çoxdur:

"Bu baxımdan, qarşılıqlı sərmayələrin yatırılması və yeni biznes imkanlarının yaradılması, hər iki ölkə üçün faydalı olacaq. Eyni zamanda, nəqliyyat və logistika sahəsində əməkdaşlıq genişləndikcə, iki ölkə arasında ticarət dövriyyəsinin artması daha da sürətlənəcək. Nəqliyyat və kommunikasiyalar sahəsində əməkdaşlıq Azərbaycan və Pakistan üçün strateji əhəmiyyət daşıyır. Azərbaycanın Şimal-Cənub və Şərq-Qərb nəqliyyat dəhlizlərində iştirak etməsi, ölkənin qlobal ticarət marşrutlarında mühüm bir logistika mərkəzi kimi mövqeyini gücləndirir. Bu baxımdan, Pakistanın da bu dəhlizlər vasitəsilə Orta Asiya və Avropa bazarlarına çıxışı daha da asanlaşacaq. Xüsusilə beynəlxalq daşımalar və tranzit imkanlarının genişləndirilməsi iki ölkə arasındakı ticari əlaqələrin gücləndirilməsinə kömək edəcək. Bundan əlavə, çoxtərəfli əməkdaşlıq formatları həm iqtisadi inkişafı, həm də regional sabitliyi təmin edir. Azərbaycanın yerləşdiyi coğrafi mövqe və nəqliyyat dəhlizlərindəki rolu Pakistanla daha sıx əlaqələrin qurulması üçün mühüm platforma yaradır.

Azərbaycan və Pakistan arasında mövcud siyasi münasibətlərin yüksək səviyyədə olması, iqtisadi və ticarət əlaqələrinin də eyni dinamika ilə inkişaf etməsi üçün böyük bir potensial yaradır. Bu baxımdan, Azərbaycan Respublikasının Prezidenti İlham Əliyev və Pakistan İslam Respublikasının Baş naziri Məhəmməd Şahbaz Şərifin iştirakı ilə Bakıda təşkil edilən biznes-forum çox vacib bir addımdır. Forum, hər iki ölkənin iş adamları və şirkətləri üçün yeni əməkdaşlıq imkanlarını araşdırmaq, bir-birinin bazarlarını daha yaxından tanımaq və müxtəlif sahələrdə tərəfdaşlıq qurmaq üçün ideal platformadır. Xüsusilə, Azərbaycan və Pakistan arasında ticarət dövriyyəsinin artırılması, birgə sərmayə qoyuluşlarının təşviqi və biznes əlaqələrinin genişləndirilməsi bu forumun əsas məqsədləri arasındadır. Siyasi səviyyədə güclü əlaqələr mövcud olsa da, ikitərəfli ticarət hələ də arzu olunan səviyyəyə çatmayıb. Bunun səbəblərindən biri kimi biznes dairələrinin bir-birinin bazarları və imkanları haqqında kifayət qədər məlumata malik olmamasını göstərmək olar. Bu cür biznes forumlar isə məhz həmin boşluqları doldurmaq və sahibkarlara yeni fürsətlər təqdim etmək baxımından böyük əhəmiyyət daşıyır. Həmçinin, sərmayə cəlbi və biznes mühitinin təşviqi istiqamətində aparılan müzakirələr, hüquqi və gömrük məsələlərinin aydınlaşdırılması iş adamları üçün əlverişli şərait yaradır.

Pakistan İslam Respublikasının Baş naziri Məhəmməd Şahbaz Şərifin Azərbaycana səfəri Azərbaycan-Pakistan münasibətlərinin yeni inkişaf mərhələsinə qədəm qoyduğunu və gələcəkdə daha sıx əməkdaşlıq imkanlarının yarandığını göstərir".

Telegramda izləyin