"Bir ölkə digərinə qarşı ərazi iddiası irəli sürürsə onların arasında sülh müqaviləsinin imzalanması mümkün deyil" - DEPUTAT

"Əgər proseslərə bugünkü reallıqları kontekstindən yanaşsaq və Azərbaycan-Ermənistan arasında imzalanacaq müqavilənin əhəmiyyətli iki şərtinin hələ də razılşadırılmadığını nəzərə alsaq, digər tərəfdən də proseslərə kənar müdaxilələrin olmasını nəzərə alsaq 2025-ci ilin ikinci yarısına qədər sülh müqaviləsinin imzalanması real görünmür".

Bunu Sonxeber.az-a danışan deputat Elçin Mirzəbəyli bildirib.

Deputat qeyd edib ki, Azərbaycanın sülh müqaviləsinin imzalanması üçün çox fundamental əhəmiyyət kəsb etdiyi şərtləri var:

"Bu şərtlərdən mahiyyət baxımından ən birincisi Ermənistanın konstitusiyasında müstəqil bəyannaməsinə istinadən yer alan ərazi iddialarıdır. Təbii ki, bir ölkə digərinə qarşı ərazi iddiası irəli sürürsə onların arasında sülh müqaviləsinin imzalanması mümkün deyil. Ermənistan konstitusiyasında bu müddəanın çıxarılması və ya bütövlükdə hüquqi normativ aktlarından Azərbaycana, eləcə də digər qonşu ölkələrə ərazi iddiaları çıxarılmalıdır. Nəticədə də sivil konstitusiyanın ortaya qoyulması üçün referendumun keçirilməsi ehtiyac var. Ermənistan bununla bağlı referendumu 2026-cı ildə keçirmək niyyətindədir. Onlar yeni konstitusiya üzərində işin getdiyini bəyan edirlər. Həmin konstitusiyada hansı məsələlərin yer alacağı ilə bağlı konkret heç nə deyilmir. Bu baxımdan da Konstitusiya ilə bağlı referendumun 2026-cı ildə keçiriləcəyi nəzərə alınarsa sülh müqaviləsinin o vaxta qədər imzalanması ehtimalı aşağıdır".

Deputat vurğulayıb ki, Rusiyanın Ermənistana bu prosesi tezləşdirməsi ilə bağlı təzyiq göstərməsi nəzərə çarpmır:

"Biz əksinə bəzi açıqlamalar və bəyanatlarda Azərbaycanın ərazi bütövlüyü ilə bağlı bəyanatların bəzi siyasi dairələr tərəfindən bəyənilmədiyinin görürük. Ola bilsin ki, Rusiyada və digər postsovet məkanındakı ölkələrdə bəzi siyasətçilər daim ərazi iddialarının qalmasında maraqlıdırlar. Bu baxımdan da Rusiyanın Ermənistana referendumu daha tez keçirməsi ilə bağlı təzyiq göstərməsi inandırıcı deyil. Çünki konstitusiya dəyişdirilərsə tək Azərbaycana deyil, həm də Türkiyə qarşı da ərazi iddiaları və qondarma soyqırım faktoru da çıxarılmalıdır. Bu da bizim üçün önəmli məsələlərdən biridir. Qondarma soyqırımından imtina edilməsinə Rusiyada və Ermənistanda müsbət yanaşılmır. Görünür Rusiyada bəzi siyasi dairələr bölgədə ayrı-ayrı ölkələr arasında ixtilaflı münasibətlərin qorunub saxlanılmasında maraqlıdır. Bu aspektdən bu məsələdə Ermənistana təzyiq göstərdiyini görmürəm. Yaxın zamanda da bununla bağlı hər hansı bir addımın artacağına inanmıram".

Telegramda izləyin