Müavinət, təqaüd və maaşlarla bağlı SEVİNDİRİCİ XƏBƏR

Azərbaycanda pensiyaların artırılmasından sonra bir sıra sosial ödənişlərdə də artımların olacağı gözlənilir.

BAKU.WS-in məlumatına görə, söhbət xüsusilə müxtəlif kateqoriyalara aid təqaüdlər, müavinətlər və təhsil işçilərinin əmək haqlarından gedir.

Hökumət pensiya islahatlarının davamı olaraq digər sosial təminat vasitələrinin də artırılması istiqamətində müvafiq addımlar atacaq. Bu çərçivədə aztəminatlı vətəndaşlara verilən müavinətlərin məbləğinin yüksəldilməsi, eyni zamanda, təhsil sektorunda çalışan işçilərin maaşlarının artırılması prioritet istiqamətlərdən olacaq.

Mart ayının ikinci yarısında Azərbaycan hökuməti tərəfindən sosial təminat sahəsində mühüm addımların atılması gözlənilir. Nazirlər Kabineti tərəfindən müxtəlif müavinət və təqaüdlərin artırılması ilə bağlı genişmiqyaslı təkliflər hazırlanaraq dövlət başçısına təqdim ediləcək.

İqtisadçi ekspert Rəşad Həsənov BAKU.WS-ə açıqlamasında bildirib ki, 2025-ci ilin büdcə sənədi təqdim edilərkən müvafiq məqsədlərlə bağlı xərclər nəzərdə tutulub:

"Eyni zamanda, hökumətin ən ali səviyyəsində bu istiqamətdə qərarların qəbul edilməsi və yeni sosial paketlərin açıqlanması ilə əlaqədar mesajlar verilib. Hazırda görünən budur ki, hökumət bu istiqamətdə həm qiymətləndirmələr aparır, həm də mövcud inflyasiya təzyiqləri fonunda çalışır ki, yaradacağı effektləri müəyyən qədər minimizə etsin. Buna görə də müəyyən gecikmələr müşahidə olunur.

Ehtimal olunur ki, ikinci rübün əvvəlindən bu qərarlar qüvvəyə minə bilər. Bu istiqamətdə müəyyən addımlar atıla bilər. Təxminən hər üç istiqamətdə 15 faiz ətrafında artımlar olması ehtimalı yüksəkdir. Xüsusilə də müavinətlər və təqaüdlər kifayət qədər çox istiqamətlidir. Buna görə də fərqli differensiallaşdırılmış bir mövqe ortaya qoyulacağı ehtimalı var.

Çünki biz minimum əmək haqqının büdcə təşkilatlarında çalışanların əmək haqqına təsirinin yenidən qiymətləndirilməsi zamanı Nazirlər Kabineti reqressiv bir yanaşma ortaya qoydu. Az gəliri olanlara münasibətdə gəlirin daha çox artırılması, yüksək gəliri olanlara münasibətdə əmək haqqının nisbətən daha aşağı faizlə artırılması müşahidə olundu.

Bu da gəlirlərin ədalətli bölüşdürülməsi istiqamətində təşəbbüslərə müəyyən qədər töhfə verə bilər və eyni zamanda müvafiq strategiyanın növbəti mərhələdə açıqlanan sosial paketlərdə də öz əksini tapacağı ehtimalları hazırda yüksək görünməkdədir".

Telegramda izləyin