"Ədalət yalnız cəzasızlıq sona çatdırıldıqda bərqərar olacaq" - DEPUTAT

"Martın 13-də Avropa Parlamenti Azərbaycan ərazilərinə qarşı həyata keçirilmiş hərbi təcavüzü planlaşdıran və icra edən, eyni zamanda hərbi cinayətlər və bəşəriyyətə qarşı cinayətlər törədən saxlanılan şəxslərlə bağlı növbəti dəfə qərəzli, şər-böhtan dolu qətnamə qəbul etdi, onların "dərhal və qeyd-şərtsiz azad edilməsini" tələb etdi".

Bunu Sonxeber.az-a danışan deputat Pərvanə Vəliyeva bildirib ki, bu məsələ ilə bağlı irəli sürülən saxta məlumatlar məhkəmənin legitimliyini şübhə altına almaq məqsədi daşıyır'

"Hərbi cinayətkarları "əsir", "girov" adlandırmaq, onların azad olunmasını tələb etmək, mühakimə prosesinə mane olmaq, həmçinin Avropa Parlamentinin mandatından kənara çıxması deməkdir. Bu parlament həmişə sanki Avropa Komissiyasının açıq ifadə edə bilmədiyi mövqeyindən çıxış edir. Korrupsiya skandalları ilə qərb mediasında tez-tez adı hallanan Avropa Parlamenti görünür yenə də erməni lobbisinin təsiri altına düşüb və anti-Azərbaycan, qərəzli, qeyri-obyektiv, ittihamlarla dolu qətnamə qəbul edir. Azərbaycanın ərazisində müharibə cinayətləri törətmiş şəxslərin ədalətli mühakiməsinə qarşı çıxanlar açıq şəkildə bu cinayətləri dəstəyənlərdir. Avropa Parlamenti bu cinayətlər törədilərkən bir dəfə belə bunları işıqlandırmadı, Ermənistan əleyhinə qətnamə qəbul etmədi, cinayətkarların həbs edilməsi ilə bağlı çağırışlar etmədi. Qətnaməyə lehinə səs verən, ermənipərəst parlamentarilərə BMT Baş Assambleyasının və BMT Təhlükəsizlik Şurasının rəsmi sənədi kimi qəbul edilmiş 2019-cu il tarixli "Azərbaycan Respublikasının işğal olunmuş ərazilərində müharibə cinayətləri və Ermənistan Respublikasının məsuliyyəti haqqında hesabat" (A/74/676 – S/2020/90) ilə tanış olmağı tövsiyə edirəm. Burada 44 günlük müharibədən öncəki vəziyyət, təxribatlar, terror aktları, terrorçuluğun maliyyələşdirilməsi üzrə faktlar və tarix boyu azərbaycanlılara qarşı törədilən bəşəriyyət əleyhinə cinayətlər barədə geniş məlumatlar yer alır".

Deputat vurğulayıb ki, hərbi cinayətlər törətməkdə təqsirləndirilən şəxslərin məhkəmə prosesini pozmağa cəhd edən, əsassız qarayaxma kampaniyası aparılsa belə, bu, Azərbaycan dövlətinin iradəsini sarsıda bilməz:

"Aparılan istintaq zamanı Ermənistanın və onun hərbi-siyasi rəhbərliyinin hərbi təcavüz və işğala görə məsuliyyət daşıdığını sübut edən mühüm faktlar aşkar olunub. Təqsirləndirilən şəxslər Ermənistanın 30 il davam etmiş hərbi təcavüzü müddətində hərbi cinayətlər, etnik təmizləmə, hərbi təcavüz, soyqırımı aktları, işgəncələr və digər ağır cinayətlər törətməkdə ittiham olunurlar. Ədalət yalnız cəzasızlıq sona çatdırıldıqda bərqərar ola bilər".

Telegramda izləyin