Builki qəbul imtahanlarında dəyişiklik gözlənilir?

2 və 9 mart tarixlərində tam orta təhsil səviyyəsi üzrə buraxılış imtahanı keçirilib. Hər iki imtahanda ümumilikdə 110 mindən çox şagird iştirak edib. İmtahan nəticələrinin 6 həftə ərzində açıqlanacağı bildirilir.

Nəticələrin gec açıqlanması, həm abituriyentləri, həm də valideynləri düşündürən əsəs məsələlərdəndir. Eyni zamanda blok imtahanlarında dəyişiklik olacağı ilə bağlı yayılan iddialar abituriyentlərdə narahatlığa səbəb olub.

Sonxeber.az xəbər verir ki, mövzu ilə bağlı Modern.az-a danışan təhsil eksperti Elçin Əfəndi bildirib ki, blok imtahanlarında hər hansı format dəyişikliyi olmayacaq:

"Builki qəbul imtahanları da əvvəlki illərdə olduğu kimi keçiriləcək. Blok imtahanındakı sual formatları əvvəlcədən Dövlət İmtahan Mərkəzi tərəfindən elan edilib. Abituriyentlər sadəcə aprelin 17-dən mayın 1-ə qədər elektron ərizə qəbulunda iştirak etməklə hansı qrupdan imtahan verəcəklərini təsdiq edəcəklər. Mayın sonu iyunun əvvəlində birinci cəhd, iyulun əvvəlində isə ikinci cəhd blok imtahanı olacaq".

Ekspertin sözlərinə görə, qəbul formatı, ixtisas qrupları üzrə fənnlər müvafiq olaraq saxlanılacaq:

"Testlərin modelində də hər hansı dəyişiklik yoxdur. Düşünürəm ki, builki imtahanlarda sualların cavablandırılması abituriyentlər üçün əlçatan olacaq".

Telegramda izləyin