Sağlam yuxunun sirləri: Hansı pozada yatsanız, özünüzü daha yaxşı hiss edərsiniz?

Yuxu sadəcə istirahət deyil, həm də bütöv bir elmdir. İnsanın yatdığı poza həzmə, tənəffüsə və hətta dərinin vəziyyətinə əhəmiyyətli dərəcədə təsir göstərə bilər.

Oxu.Az-ın xəbərinə görə, bu barədə rusiyalı kardioloq və yuxu mütəxəssisi Nataliya Zolotaryova Gazeta.ru-ya müsahibəsində danışıb.

Mütəxəssisin fikrincə, böyrü üstə, xüsusilə də sol böyrü üstə yatmaq həzm sistemi üçün daha faydalıdır. Mədə anatomik olaraq solda yerləşir, buna görə də qravitasiya qüvvəsi qidanın təbii şəkildə mədə-bağırsaq traktından (həzm yolu) keçməsinə kömək edir və qıcqırma hissi və turşu reflüsü riskini azaldır. Ancaq sağ tərəfdə yatmaq, əksinə, bu problemləri daha da ağırlaşdıra bilər.

"Lakin bu pozanın mənfi tərəfləri də var: çiyin və ya bud nahiyəsinə təzyiq bəzən uyuşmaya səbəb olur, üzün yastığa sürtünməsi isə "yuxu qırışları" - zaman keçdikcə qalıcı ola biləcək qatların yaranmasına gətirib çıxarır. Məsləhət görülür ki, sürtünməni azaltmaq üçün orta sərtlikdə yastıq və ipək yastıq üzlükləri seçilsin", - deyə Zolotaryova bildirib.

Onun sözlərinə görə, beli üstə yatmaq onurğa sağlamlığının və dərisinin gözəlliyinin qayğısına qalanlar üçün ideal seçimdir. Bu pozada bədən neytral vəziyyətdə olur ki, bu da boyun və bel bölgələrinə düşən yükü azaldır. Bundan əlavə, üz yastıqla təmasda olmur ki, bu da qırışların və qıcıqlanmaların yaranma riskini azaldır.

"Amma bir nüans var: beli üstə yatarkən tez-tez xoruldama və obstruktiv apnoe (nəfəs almada fasilələr) baş verir, çünki dil qırtlağın önünü bağlaya bilər. Əgər buna meyillisinizsə, çarpayının başını qaldırmağa və ya yan tərəfə dönməyə çalışın", - deyə mütəxəssis qeyd edib.

Natalya Zolotaryova, həmçinin əlavə edib ki, bir çox insanın sevdiyi qarnı üstə yatmaq ən problemli pozadır. Bu vəziyyətdə baş yan tərəfə çevrilir ki, bu da onurğanın boyun nahiyəsinə artıq yüklənmə verir və ağrıya səbəb ola bilər. Döş qəfəsi sıxılır, dərindən nəfəs almaq çətinləşir, mədəyə təzyiq isə bəzən narahatlıq yaradır.

"Dəri üçün də bu yaxşı variant deyil: üz bütün gecəni yastığa "yapışır", bu da qırışlara, şişkinliyə və hətta səpkilərə səbəb olur. Əgər bu pozadan imtina etmək çətindirsə, o zaman nazik yastıqdan istifadə edin və ya boyun əyriliyini azaltmaq üçün yastıqsız yatın", - deyə həkim vurğulayıb.

Bundan irəli gələrək, Natalya Zolotaryova bir neçə məsləhət verib: mədə qıcqırması zamanı sol böyrü üstə yatmağı seçmək daha yaxşıdır, qırışların qarşısını almaq üçün beli üstə yatmaq idealdır, əgər xorultudan əziyyət çəkirsinizsə, beli üstə yatmaqdan çəkinin, dərinin rahatlığı üçün ipək yastıq üzlüklərindən istifadə edin.

"Unutmayın: hər kəs üçün ideal poza yoxdur. Orqanizminizin xüsusiyyətlərini nəzərə alaraq sınaqlar keçirin və sonra yuxu sağlamlıq uğrunda mübarizədə sizin sadiq müttəfiqinizə çevriləcək", - deyə kardioloq bildirib.

Telegramda izləyin