Nazirliyin siyahısına düşə bilməyən plastik cərrahları nə gözləyir? - Cinayət MƏSULİYYƏTİ VAR

Səhiyyə Nazirliyi yanında yaradılmış Xüsusi Təftiş Komissiyası ölkə ərazisində fəaliyyət göstərməyə icazəsi olan plastik cərrahların siyahısını açıqlayıb, lakin həmin siyahıda populyar və çoxsaylı insanı əməliyyat etmiş bir sıra plastik cərrahların adları yer almayıb.

İndiyə qədər bu həkimlərdən bəziləri barəsində şikayətlər əsasında araşdırma aparılıb və onlar məsuliyyətə cəlb ediliblər. Digərləri ilə bağlı isə hüquqi tədbirlər görülməyib. Maraqlıdır, Komissiyanın açıqladığı siyahıdan kənarda qalan plastik cərrahlar məsuliyyətə cəlb oluna bilərlərmi? Onlar barəsində hansı hüquqi addımlar atıla bilər?

Bu barədə Oxu.Az-ın suallarını cavablandıran vəkil Asim Abbasov deyib ki, adı Xüsusi Təftiş Komissiyasının açıqladığı siyahıda olmayan mütəxəssisləri sertifikatları ləğv olunduğuna görə hansısa məsuliyyət gözləmir:

"Lakin həmin mütəxəssislər əvvəl icra etdikləri əməliyyatda ictimai təhlükəli əməl törədiblərsə, buna görə məsuliyyət daşıyırlar. Yəni sırf sertifikatlarının ləğv edilməsi onlarda məsuliyyət yaratmır".

Vəkil həmçinin qeyd edib ki, özəl tibb əczaçılıq, təhsil fəaliyyəti, lisenziya tələb edən fəaliyyət növlərindəndir:

"Bu sahələrin lisenziyalaşdırılması dövlət təhlükəsizliyinin təmin edilməsi, ətraf mühitin, insanların həyat və sağlamlığının qorunması məqsədi daşıyır. Lisenziya olmadan fəaliyyət göstərənlər məsuliyyətə cəlb edilirlər. Azərbaycan Respublikası İnzibati Xətalar Məcəlləsinin 210.1-ci maddəsinə əsasən Lisenziya olmadan özəl tibbi fəaliyyətlə və ya əczaçılıqla məşğul olmağa görə fiziki şəxslər iki min manatdan üç min manatadək məbləğdə, vəzifəli şəxslər beş min manatdan on min manatadək məbləğdə, hüquqi şəxslər iyirmi min manatdan otuz min manatadək məbləğdə cərimə edilirlər. Eyni zamanda, əhalinin sağlamlığının qorunması ilə bağlı qanunvericiliyin pozulmasına görə də İnzibati Xətalar Məcəlləsinin 215-ci maddəsində inzibati məsuliyyət nəzərdə tutulub. Belə ki, İnzibati Xətalar Məcəlləsinin 215.4-cü maddəsinə əsasən Qanunvericiliyə uyğun olaraq sertifikasiyadan keçməyən şəxslərin (işçilərin) praktik tibb və əczaçılıq fəaliyyətinə buraxılmasına görə vəzifəli şəxslər səkkiz yüz manatdan min manatadək məbləğdə, hüquqi şəxslər altı min manatdan səkkiz min manatadək məbləğdə cərimə edilir".

Vəkil həmçinin deyib ki, lisenziya tələb olunduğu halda onu almadan işləyən, lisenziyalaşdırılma şərtlərinin pozulması ilə həyata keçirilən sahibkarlıq fəaliyyəti ilə məşğul olan şəxslərin həm inzibati xəta, həm də cinayət məsuliyyəti var. Bunun inzibati xəta, yoxsa cinayət tərkibi yaratması vurulmuş zərərin və ya əldə edilmiş gəlirin həcmindən asılı olaraq müəyyənləşdirilir.

Telegramda izləyin