Gecəki ailə faciəsi ilk deyildi... - Sabirabadda yanğın kabusu

Xəbər verdiyimiz kimi, ötən gecə Sabirabadın Muğan Gəncəli kəndində fərdi yaşayış evində baş verən yanğın 4 nəfərlik gənc ailənin məhvinə səbəb olub.

"Qafqazinfo"nun məlumatına görə, ötən gün rayonun adıçəkilən kəndində olan hadisə Sabirabadda yaşanan ilk belə faciə deyil.

Belə ki, 2012-ci ilin martında rayonun Qaraqaşlı kənd sakini Abdulkərim Murtuzayevə məxsus evdə qeydə alınan güclü yanğında ev sahibinin oğlu - Valehin və onun 3 övladının yanmış meyitləri tapılıb. A.Murtuzayev və gəlini Emiliya isə yanıq xəsarətləri alıb.

2013-cü ilin oktyabrında isə rayonun Quruzma kəndində baş verən güclü yanğında ev sahibinin həyat yoldaşı yanıq xəsarəti alıb, 2011-ci il təvəllüdlü nəvəsi isə vəfat edib. Digər 2 azyaşlı son anda xilas edilib.
2014-cü ilin dekabrında Sabirabadın Qaratuğay kəndindəki yanğında isə ailənin 5 üzvü: 1967-ci il təvəllüdlü Rzayeva Nəzakət Hüseynağa qızı, 1991-ci il təvəllüdlü Rzayeva Lamiyə Mahir qızı, 2009-cu il təvəllüdlü Rzayeva Mənsumə Zabil qızı, 2012-ci il təvəllüdlü Rzayeva Yağmur Zabil qızı və 2013-cü il təvəllüdlü Rzayeva Gülay Zabil qızı həyatını itirib.

Oxşar hadisələr növbəti illərdə də bir neçə dəfə təkrarlanıb.

Son olaraq bu ilin 10 aprel tarixində Sabirabadın Bala Həşimxanlı kəndində fərdi yaşayış evində baş vermiş yanğın zamanı xəsarət alan 13 yaşlı Yasəmən Məmmədli Bakıda xəstəxanada vəfat edib. Daha 6 nəfər isə xəstəxanaya yerləşdirilib.

Mütəxəssislər bildirirlər ki, baş verən yanğınların əsas səbəbi təhlükəsizlik qaydalarına əməl edilməməsidir.

Telegramda izləyin