Azərbaycan mobil rabitə bahalaşıb? - AÇIQLAMA

"Azərbaycanda mobil operator sektoru məhdud səviyyədə olduğu üçün tələb təklifi üstələyir. Yəni ölkədə rəqabət azdır, cəmi üç mobil operator fəaliyyət göstərir. İnsanların seçimi çox deyil, məhduddur. Bu səbəbdən tələb təklifi üstələyib və mobil operator sektorundakı fəaliyyət göstərən şirkətlər öz təkliflərini vətəndaşa diktə edə bilirlər".

Bu sözləri BAKU.WS-ə açıqlamasında Rəqəmsal İnkişaf və Nəqliyyat Nazirliyinin yanında fəaliyyət göstərən İctimai Şuranın üzvü Elvin Abbasov bildirib.

O əlavə edib ki, hazırda vətəndaşların mövcud dəyişikliyi tam olaraq başa düşməməsi ajotaja səbəb olub:

"Bildirmək istərdim ki, sözügedən operatorda qiymət dəyişikliyi yoxdur, metodun dəyişməsi var. Bu daxili marketinq strategiyasıdır, yəni müştəri yanaşmaları dəyişdirilir və yeni metodologiya tətbiq olunur.

Fikrimcə, metrologiya dəyişimi müştəri yönümlü deyil və bu, daha çox korporasiya yönümlüdür. Yəni marketinq strategiyası qurumun daha çox gəlir əldə etməsinə fokslana bilər ki, bu da təbii bir haldır. Hər hansı kommersiya qurumu istənilən halda gəlirlərini artırmağa fosklana bilər".

E.Abbasov hesab edir ki, dəyişikliklər o zaman olmalıdır ki, qurumlar investisiya etsinlər:

"Bu dəyişiklikdə qiymət artımı müşahidə olunmasa da, vətəndaşın daha çox ödəyəcəyi müşahidə olunur. Tutaq ki, bir manat ödəməklə beş gün istifadə etmək olurdu. İndi bir manat ödəyir, amma onu xərcləməsə də bir gündən sonra istifadə edə bilmir. Pul balansında olsa da, balans bağlanır. Yəni nöbəti gün bir manat ödəməklə, 2 manat istifadə edə biləcək.

Lakin qurumlar özlərinə investisiya etdikdən sonra dəyişikliklər etməlidir. Yəni hər hansı bir investisiyanın qarşılığında xidməti rüsumlar və ya metdologiya dəyişməsi daha ağlabatan və məntiqli ola bilər. Azərbaycandakı mühit sadəcə rəqabətin olmamasından irəli gəlir.

Digər tərəfdən Azərbaycanın xarici ölkələrlə müqayisə olunası tərəfi yoxdur. Səbəb odur ki, xaricdə ən aşağı mobil internet sürəti 100 mbit-ə qədər təklif olunur. Bu, o deməkdir ki, yəni onlarda mobil internetlə bizim çəkdiyimiz fiber-optik internet arasında problem yoxdur. Çox sürətlidir, hətta 5G tətbiq edirlər.

Yəni, burada biz onların gəldiyi texnologiya səviyyəsi ilə onların qiymətləri ilə Azərbaycanı müqayisə etməyək. Çünki meyarlar uyğun deyil. Yəni müqayisə üçün birbaşa meyar lazımdır və mən qonşu ölkələrlə aramızda böyük texnologiya uçurumu görürəm".

Telegramda izləyin