"Qərbi Azərbaycanlıların tarixi torpaqlarına sülh yolu ilə qayıdışı Azərbaycanın milli hədəflərindən biridir" - DEPUTAT

"Qərbi Azərbaycandan olan soydaşlarımızın hüquqlarının müdafiəsi və onların tarixi torpaqlarına qayıdış ideyasının cəmiyyətimizdə geniş şəkildə təbliği istiqamətində bölgələrdə mühüm və məqsədyönlü addımlar atılır".

Bunu Sonxeber.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib.

Deputat qeyd edib ki, hazırda ölkəmizin müxtəlif rayonlarında hökümət və qeyri-hökumət təşkilatları tərəfindən Qərbi Azərbaycan həqiqətləri ilə bağlı ictimai dinləmələr, maarifləndirici görüşlər, seminarlar və mədəni tədbirlər keçirilir:

"Bu tədbirlərdə Qərbi Azərbaycanda xalqımıza məxsus tarixi-mədəni irs, sistemli şəkildə həyata keçirilmiş deportasiya prosesi, ondan qaynaqlanan faktlar və beynəlxalq hüquq normaları çərçivəsində sülh yolu ilə qayıdış konsepsiyası önə çəkilir. Eyni zamanda məktəblərdə, gənclər təşkilatlarında və mədəniyyət mərkəzlərində bu mövzuya dair xüsusi proqramlar tətbiq edilir, mediada maarifləndirici materiallar yayımlanır.

Bu istiqamətdə görülən işlər bilavasitə Möhtərəm Cənab Prezident İlham Əliyevin siyasi iradəsinə və strateji baxışına əsaslanır. Ölkə başçımız dəfələrlə bəyan edib ki, Qərbi Azərbaycanlıların tarixi torpaqlarına sülh yolu ilə qayıdışı Azərbaycanın milli hədəflərindən biridir və bu məsələdə beynəlxalq hüquq çərçivəsində ardıcıl fəaliyyət həyata keçiriləcək. Məhz dövlət başçısının rəhbərliyi ilə formalaşan bu konseptual yanaşma milli həmrəyliyin gücləndirilməsinə, tarixi ədalətin bərpasına və Qərbi Azərbaycan həqiqətlərinin ictimai şüurda möhkəmlənməsinə xidmət edir".

Telegramda izləyin