Hikmət Babaoğlu: "Bugünkü qalib Azərbaycan qurtuluşdan doğan dövlətin varisidir"

"Bugünkü qalib Azərbaycan 1993-cü il iyunun 15-də əsası qoyulan və qurtuluşdan doğan Azərbaycanın hüquqi, siyasi, mənəvi varisidir".

Bunu Oxu.Az-a açıqlamasında Milli Məclisin deputatı, Müdafiə, Təhlükəsizlik və Korrupsiya ilə Mübarizə Komitəsinin üzvü Hikmət Babaoğlu deyib.

O qeyd edib ki, bu gün Qurtuluş Günü kimi qeyd etdiyimiz tarixi hadisənin Azərbaycanın milli dövlətçilik tarixində çox mühüm əhəmiyyəti var.

"Çünki 3-4 iyun hadisələrindən başlayaraq, 15 iyuna qədər uzanan bir dövr ərzində, 1993-cü ildə Azərbaycan dövlətçiliyinin mövcud olub-olmaması və ya bugünkü unitar dövlət kimi qalıb qalmaması məsələsi həll olunurdu.

Çünki 1993-cü ilin yaz aylarında artıq etnik separatçılığın Azərbaycanda pik həddinə çatması hadisəsi baş verirdi. Azərbaycanın şimalında, sadval bölücüləri ayrı bir "dövlət", cənubunda isə "Talış Muğan Respublikası" deyilən qondarma qurum yaratmağa cəhdlər edilirdi.

Azərbaycanın qərbində isə əslində regional separatçılıq baş verirdi - Surət Hüseynov ayrıca bir dövlət yaratmağa çalışırdı. Beləliklə, Azərbaycanın bütövlükdə dövlətçiliyi, eyni zamanda, həm də unitar quruluşa malik olan bir dövlətçiliyinin olub-olmaması məsələsi həll olunurdu".

H.Babaoğlu vurğulayıb ki, 15 iyunun tarixi əhəmiyyəti, ulu öndər Heydər Əliyevin Azərbaycanın coğrafi və etnik əlamətlər üzrə bölünməsinin qarşısında almasıdır.

"Ulu öndər 1993-cü il iyun ayının 15-də Azərbaycan Respublikasının Milli Məclisinə sədr seçilməklə Azərbaycanda baş qaldıran etnik və regional separatçılığa son qoymağı və ölkənin bu gün mövcud olan dövlət quruluşu formasını, dövlətçiliyini qoruyub saxlamağı bacardı. Bu əsaslarda təməli qoyulan milli dövlətimiz isə nəticə etibarilə, ən sonda, Azərbaycanın qərbində baş verən erməni separatizmini məhv etdi və ona da son qoya bildi.

Yəni bugünkü qalib Azərbaycan 1993-cü il iyunun 15-də əsası qoyulan qurtuluşdan doğan Azərbaycanın hüquqi, siyasi, mənəvi varisidir və Qurtuluş Gününün tarixi əhəmiyyəti də bundan ibarətdir.

Əgər bu gün biz qalib Azərbaycandan danışırıqsa, suveren hüquqlarımızın hər qarış ərazimizdə bərpa olunmasından danışırıqsa, bu gün Xankəndidə quruculuq işləri aparırıqsa, Xocalıya, Ağdama, Şuşaya qayıdırıqsa, bütün bunların hamısının başlanğıcı 15 iyun tarixinə bağlıdır. Ona görə də biz daim 15 iyunda nələr baş verdiyini analiz etməliyik. Milli yaddaşımızda bunu diri tutmalı və gənc nəslin də dövlətçilik şüuruna bunu yazmağı bacarmalıyıq ki, əslində biz nələrdən xilas olmuşuq, Qurtuluş Günündə nədən qurtulmuşuq? Ona görə mən düşünürəm ki, bu mühüm tarixi hadisə əslində, bugünkü qüdrətli Azərbaycana gələn yolun başlanğıcı idi və Azərbaycan dövlətçiliyinin xilası tarixidir", - deyə deputat bildirib.

Telegramda izləyin