Bankomat istifadəçilərinə vacib xəbərdarlıq: Bu düyməyə basmadan əməliyyata başlamayın

Bankomat dələduzluğu getdikcə daha təkmil və gizli üsullarla istifadəçiləri tələyə salmağa davam edir. Ən geniş yayılmış üsullardan biri kart daxil edilən hissəyə yerləşdirilən saxta kart oxuyuculardır.

Sonxeber.az xəbər verir ki, bu qurğular bankomatın orijinal oxuma mexanizminə bənzər şəkildə işləyir və kartın maqnit lentindən və ya çipindən məlumatları kopyalayaraq dələduzların əlinə keçməsinə şərait yaradır.

Bankomat xaricdən baxıldıqda adi görünə bilər, lakin bu cür saxta qurğular çox zaman istifadəçilər tərəfindən seçilmir. Bu isə dələduzluq riskini daha da artırır. Mütəxəssislər bildirirlər ki, bankomatlardan istifadə zamanı bəzi sadə, lakin təsirli addımlar vasitəsilə bu risklərdən qorunmaq mümkündür.

Mütəxəssislərin diqqət çəkdiyi əsas təhlükəsizlik tədbirlərindən biri kartı daxil etməzdən əvvəl bankomatın "LƏĞV ET" (və ya "İPTAL") düyməsinə basmaqdır. Bu addım bankomatın saxta bir qurğuya bağlı olub-olmadığını müəyyən etməyə kömək edə bilər. Əgər aparat üzərində qanunsuz bir mexanizm varsa, bu sadə əməliyyat sistemin işini poza və ya onu deaktiv edə bilər. Mütəxəssislər bildirirlər: "LƏĞV ET düyməsinə basmaq dələduzların qurduğu sistemi sıradan çıxara bilər. Hər istifadədən əvvəl bu addımı atmaq istifadəçi təhlükəsizliyi baxımından böyük əhəmiyyət daşıyır."

Təhlükəsizliyi artırmaq üçün tövsiyə edilən digər bir üsul isə QR kod vasitəsilə əməliyyat aparmaqdır. Bu sistem sayəsində istifadəçilər bankomata kart daxil etmədən, yalnız mobil tətbiq üzərindən əməliyyatlarını həyata keçirə bilirlər. Fiziki kart istifadə olunmadığı üçün dələduzların kart məlumatlarını ələ keçirmə ehtimalı aradan qalxır. Mütəxəssislər bildirirlər ki, "QR kod vasitəsilə əməliyyat kartın kopyalanması riskini minimuma endirir və mobil tətbiqlərlə aparılan əməliyyatlar daha təhlükəsiz hesab olunur."

Bankomatlardan istifadə zamanı ehtiyatlı olmaq dələduzluqdan qorunmağın ən effektiv yollarından biridir. Mütəxəssislər xəbərdarlıq edirlər ki, kart girişində qeyri-adi çıxıntı, boşluq və ya qəribə səs hiss edilərsə, əməliyyata başlamadan bankomatdan uzaqlaşmaq lazımdır.

Vüsalə İbrahimli

Telegramda izləyin