"Mehdi Sobhani diplomatik mandatını aşaraq sistemli şəkildə Azərbaycanın daxili işlərinə qarışmağa cəhd edir" - Bəhruz Quliyev

"İranın Ermənistandakı səfiri Mehdi Sobhaninin İqtisadi Əməkdaşlıq Təşkilatının (İƏT) Xankəndi şəhərində keçirilmiş Zirvə görüşü ilə bağlı səsləndirdiyi fikirlər nə diplomatik etiketə sığır, nə də beynəlxalq hüquq normaları ilə uzlaşır. Azərbaycan Xarici İşlər Nazirliyinin verdiyi cavab tam əsaslı və siyasi cəhətdən ölçülü reaksiya olmaqla yanaşı, bir həqiqəti də ortaya qoydu: İran nümayəndəsi təəssüf ki, növbəti dəfə anti-Azərbaycan ritorikasına üstünlük verərək Ermənistanın informasiya məkanında siyasi manipulyasiya ilə məşğul olub".

Bunu Sonxeber.az-a danışan Səs qəzetinin baş redaktoru, siyasi ekspert Bəhruz Quliyev deyib.

"Qeyd edim ki, əslində bu, Mehdi Sobhaninin ilk anti-Azərbaycan xarakterli çıxışı deyil. O, diplomatik mandatını aşaraq sistemli şəkildə Azərbaycanın daxili işlərinə qarışmağa cəhd edir. Bu isə yalnız Azərbaycan-İran münasibətlərinə zərbə vurmaqla qalmır, həm də İranın bölgədəki səmimiyyətinə dair suallar doğurur.

Xankəndi Kommünikesinin formatı və məzmunu ilə bağlı səfirin verdiyi açıqlamalar tamamilə əsassızdır. Zirvə görüşlərinin nəticə sənədləri təşkilatın təcrübəsinə uyğun olaraq sədrlik edən dövlətin xülasəsi formatında hazırlanır və bütün üzv ölkələr üçün tanınmış prosedurdur. İran da daxil olmaqla bütün üzvlər bu qaydanı qəbul edib və sonuncu İstanbul sessiyasında qəbul edilən qərarlarda – o cümlədən Qərbi Azərbaycan İcmasının öz yurdlarına qayıdış hüququnun tanınmasında – konsensusla iştirak edib. Belə olan halda, səfirin fərqli mövqe nümayiş etdirməsi ya şəxsi təşəbbüs, ya da məqsədli informasiya manipulyasiyasıdır".-deyə ekspert şərh edib.

B. Quliyev "Sual olunur: İranın Ermənistandakı səfiri kimə və nəyə xidmət edir? Regionda sülhün və sabitliyin möhkəmlənməsinə, yoxsa revanşist dairələrin yalan təbliğatına? Əgər İran rəsmiləri real və konstruktiv münasibət tərəfdarıdırsa, Ermənistan informasiya agentliklərinə yox, rəsmi diplomatik kanallara üstünlük verməlidirlər.

Azərbaycan dövləti və xalqı dostluğu da unutmur, düşmənçiliyi də. Bu gün İranla münasibətlərdə buzları əriməsi, bizi pozitiv düşünməyə sövq etdiyi vaxtda rəsmilərindən gözləntilərimiz regionda sabitliyə, əməkdaşlığa və beynəlxalq hüququn aliliyinə söykənən mövqe sərgiləməkdir. Əks halda, səfirin sözləri nəinki nəticə doğurmayacaq, əksinə, İranın Cənubi Qafqaz və qonşuluq siyasətinə kölgə salacaq" - deyə əlavə edib.

Telegramda izləyin