Gənclər evlənməkdən niyə imtina edir? - AÇIQLAMA

"Artıq gənclərin evliliyə maraq göstərməməsi heç kimi təəccübləndirmir. Üstəlik, bu hadisə təkcə Azərbaycana məxsus deyil - dünyanın müxtəlif ölkələrində də oxşar tendensiyalar müşahidə olunur. Bu isə göstərir ki, qarşı-qarşıya olduğumuz məsələ sadəcə keçici trend yox, geniş miqyaslı və dərin sosioloji transformasiyadır. Bu gün əksər gənclərin evliliyə maraq göstərməməsinin bir sıra səbəbləri var. İndiki dövrdə şəxsi inkişaf, azadlıq və karyera qurmaq kimi fərdi hədəflər prioritet kimi görülür. Evlilik isə bir çoxları üçün bu azadlıqları məhdudlaşdıran sosial mexanizm kimi görünür".

Bu sözləri Sonxeber.az -a sosioloq Yusif Nəbiyev danışıb.

O, açıqlamasında qeyd edib ki, bundan başqa, Qərb mədəniyyətinin təsiri ilə yalnız fərdiyyətçilik deyil, eyni zamanda gender bərabərliyi və feminizm kimi ideoloji cərəyanlar da yayılmağa başlayıb:

"Nəticədə, ailədaxili rollar daha çox sorğulanır, uzun illər dəyişməz qalmış sosial rollar sarsılır. Məsələn, qadınlar artıq özlərini təkcə "ev xanımı" kimi deyil, daha sərbəst və müstəqil subyektlər kimi görürlər. Onlar oxuyur, işləyir, sərbəst yaşamağı hədəfləyirlər. Paralel şəkildə bəzi kişilər də ailənin tək təminatçısı rolunu öz üzərlərinə götürmək istəmirlər.

Bundan əlavə olaraq, evlilikdənkənar münasibətlərin yayılması da ailə institutun funksiyalarından birini – intim münasibətin təmin olunmasını qeyri-işlək hala salır. Bunu əldə etmək üçün artıq ailəyə ehtiyac qalmır.

Gənclər arasında qeyri-rəsmi münasibətlər, birlikdə yaşamaq, "açıq münasibətlər" kimi formatlar normal qəbul olunmağa başlayır. Beləliklə də, evlilik öz normativ statusunu get-gedə itirir. Bu kimi qlobal səbəblərdən əlavə olaraq, sırf yerli reallıqlarla bağlı səbəblər də gənclərin evlilik qərarına təsir edir.

Sosioloq onu da qeyd etdi ki, əsas problemlərdən biri iqtisadi qeyri-sabitlik və gündən-günə artan yaşayış xərcləridir:

"Stabil gəliri olmayan, maddi baxımdan ayaqda dura bilməyən bir insan ailə qurub, başqasının məsuliyyətini necə üzərinə götürə bilər? Bu səbəbdən evlilik bir çox gənc üçün həm də böyük maliyyə yükü kimi görünür. Ev, iş, maddi təminat kimi əsas ehtiyaclar bir çoxları üçün ya əlçatmaz xəyaldır, ya da çox gecikən bir hədəfdir.

Unudulmamalıdır ki, təkcə ailə qurmaq yox, həmin ailəni qoruyub saxlamaq da əvvəlki ilə müqayisədə daha çətindir. Boşanma hallarının durmadan artması da deyilənləri təsdiq etməkdədir. Və bu artan boşanma statistikası özü də subay gənclər arasında narahatlıq, tərəddüd və etimadsızlıq doğurur.

Əgər ciddi sosial strategiyalar hazırlanmasa və vaxtında tədbirlər görülməsə, Azərbaycan da digər ölkələrin yolunu təkrarlayacaq. Bu gedişlə ailə institutuna olan inam və maraq daha da zəifləyəcək".

Vüsalə İbrahimli

Telegramda izləyin